प्रदेश मांय काले सूं शीतलहर रो पैलो दौर सरू होणे री आस है। लारला कुछ दिनां सूं प्रदेश रा न्यारा-न्यारा ज़िला मांय दिन अर रात रे तापमान मांय गिरावट देखी जा रही है। लारला चौबीस घंटां रे चालता सब सूं कम लूणकरणसर मांय 8 दशमलव 8 डिग्री सेल्सियस न्यूनतम तापमान दर्ज कर्यो गयो। शेखावाटी रे फतेहपुर मांय 8 दशमलव 9, नागौर मांय 9 दशमलव 3, चूरू मांय 9 दशमलव 6, पिलानी मांय 10, करौली मांय 10 दशमलव 1, दौसा मांय 10 दशमलव 7 अर राजधानी जयपुर मांय 14 दशमलव 7 डिग्री सेल्सियस कमती तापमान दर्ज व्ह्यो। मौसम मेहकमो आगले दो-तीन दिनां मांय तापमान मांय गिरावट रा आसार जताया है। इण रे असर सूं केई जगावां माथे शीतलहर री आस है। शेखावाटी हलका मांय कमती तापमान 4 सूं 5 डिग्री सेल्सियस रे बीचे दर्ज होणे री आसार है। वठिने सर्दी रो असर बधने रे साथै ई भरतपुर रे केवलादेव राष्ट्रीय उद्यान घना मांय पक्षियां री तादाद लगोतार बधती जा री है। अठिने 30 हजार सूं बत्ती परिंन्दा डेरा डालेडा है। मान्यो जा रह्यो की इण बार मेहमान पंछियां री तादाद करीब 50 हजार तांई पहुंच सके है।