प्रदेश मांय कमती रा तापमान मांय कमी रे साथे ही ठण्ड रा तेवर तीखा व्हे ग्या है। मौसम महकमा रा आंकडा मुजब घणकरी ठौडां तापमान सामान्य ऊं नीचे आय ग्यो। माउन्ट आबू मांय तापमान लुढकने जमाव बिन्दु ऊं नीचे दर्ज व्हीयो, वठे ई मैदानी हलकां मांय सीकर सब ऊं ठण्डी ठौड रियो, जठे कमती रो तापमान 2 दशमलव 8 डिग्री रिकॉर्ड करी ज्यो। राजधानी जयपुर मांय ई रात रा पारा मांय कमी ऊं ठण्ड बण्योडी है। ईं बीचे केई ठौडां संवारा घणा कोहरा रे कारण जिन्दगी माथे असर पड्यो है। मौसम महकमो आवता दो-तीन दिन राज्य रा केई ठौडां घणा कोहरो छाया रेहवण री आस जताई है। आवता दो-तीन दिन मांय तापमान मांय एक ऊं दो डिग्री री कमी आवण अर उतराद हलकां मांय शीतलहर री आस जताई है। राज्य रा घणकरां हलकां मांय आवता 48 घंटां रे दौरान बत्ती रो तापमान सामान्य ऊं दो ऊं पांच डिग्री सेल्सियस नीचे दर्ज होवण अर कठे-ई-कठे दिन ई घणा ठण्डा होवण सारू चेताया है।