प्रदेश मांय उतराद हलकां ऊँ आ रह्या सीळा बायरा ऊँ मैदानी हलकां मांय सर्दी रो असर बध्यो है, जद के पहाड़ी ठौड़ां पारो थोड़ो चढ्यो। राज्य मांय सैर-सपाटा री एकली पहाड़ी ठौड़ माउंट आबू मांय लारला दिनां री तुलना मांय ठंड ऊं मामूली साता मिली है। वठे पारो जमाव बिन्दु रे आरे-सारे चाल रह्यो हो जो बुधवार ने चढ़ र 5 डिग्री सेल्सियस तांई पूग ग्यो। दूजी कानी कोटा मांय बाज रह्या सीळा बायरां ऊँ ठण्ड रो असर बध ग्यो। वठे संवारे री पोर हल्की धुंवर रही अर 10 बज्यां तांई ई तावड़ो नी निकळ्यो। जयपुर मांय बुधवार ने पारो उतर र 11 दशमलव 6 डिग्री सेल्सियस दर्ज करी ज्यो। मौसम विभाग आवता दिनां पारा मांय और उतार चढ़ाव रा आसार जताया है।