प्रदेश मांय ई स्वाधीनता दिवस जळसापूरण मनायी ज्यो। जोधपुर रा बरकतुल्लाह खां स्टेडियम मांय व्हीया राज्य थर रा जळसा मांय बोलता मुख्यमंत्री भजनलाल शर्मा कह्यो के समाज रा सगळा तबका रे आत्मनिर्भर बणण ऊं ईं देश आत्मनिर्भर बणेला। वणां कह्यो के राज्य सरकार विकसित भारत 2047 रा संकल्प ने पूरो करण सारू केन्द्र सरकार रे साथे कदम उं कदम मिला र चाल री है। वणां राज्य सरकार री न्यारी-न्यारी जनकल्याणकारी योजनावां रो जिक्रो करता कह्यो के समाज रा हर पात्र मिनख ने इण रो फायदो पुगायो जावे। मुख्यमंत्री वोकल फॉर लोकल ने बधावो देवण री ई अरज करी। मुख्यमंत्री ध्वजारोहण करने मार्च पास्ट रो निरीक्षण कर्यो। इण उं पैलां वणां जोधपुर रा सर्किट हाउस मांय झंडो फहरायो अर शहीद स्मारक माथे पुष्प चक्र अर्पण करने श्रद्धांजलि दी। राज्यपाल हरिभाऊ बागड़े जयपुर मांय राजभवन मांय झंडो फहरायो। ईं दौरान राज्यपाल राजभवन परिसर रा सरकारी स्कूल रा ठावा नम्बर लावण वाळा पढेसरां ने ईनाम मांय किताबां अर मिठाईयां बांटी। राज्यपाल ‘एक पेड़ मां के नाम‘ अभियान रे तैत खेजड़ी रो पौधो ई लगायो। विधानसभा अध्यक्ष वासुदेव देवनानी विधानसभा मांय ध्वजारोहण कर्यो। वठे ई जयपुर मांय चौगान स्टेडियम मांय व्ह्या जिला थर रा जळसा मांय उपमुख्यमंत्री प्रेमचन्द बैरवा झंडो फहरायो अर परेड री सलामी ली। प्रदेश भाजपा मुख्यालय माथे भाजपा प्रदेश अध्यक्ष मदन राठौड झंडो फहरायो। वठे ई प्रदेश कांग्रेस कमेटी दफ्तर माथे प्रदेश अध्यक्ष गोविन्द सिंह डोटासरा राष्ट्रीय ध्वज फहरायो। ईं मौके पैली रा मुख्यमंत्री अशोक गहलोत, नेता विपख टीकाराम जूली समेत दूजा लोग मौजूद रिया। प्रदेश रा न्यारा-न्यारा जिला मांय ई प्रभारी मंत्रियां, संभागीय आयुक्तां अर जिला कलेक्टर राष्ट्रीय ध्वज फहरायो। डीग जिला मुख्यालय माथे गृह राज्य मंत्री जवाहर सिंह बेढम झंडो फहरार परेड री सलामी ली। कोटपूतली-बहरोड़ जिला मांय उपमुख्यमंत्री दीया कुमारी राष्ट्रीय ध्वज फहरायो। ई मौके वणां वीरांगनावां अर ठावा काम करण वाळी प्रतिभावां रो सम्मान कर्यो। पाली मांय जिला थर रा जळसा मांय गौपालन मंत्री जोराराम कुमावत झंडो फहरायो। कोटा मांय व्हीया स्वाधीनता दिवस जळसा मांय शिक्षा मंत्री मदन दिलावर ध्वज फहरा र परेड री सलामी ली। बाडमेर रा आदर्श स्टेडियम मांय व्हीया जळसा मांय उद्योग राज्यमंत्री के.के. विश्नोई तिरंगो फहरायो। जल संसाधन मंत्री सुरेश सिंह रावत अजमेर रा पुलिस लाइन मैदान मांय व्हीया जळसा मांय ध्वज फहरायो। राज्यभर मांय न्यारा-न्यारा दफ्तरां, कारोबारी ठिकाणां अर घरां माथे लोगां तिरंगो फहरायो। इण रे साथे ही स्कूलां अर शैक्षणिक संस्थावां मांय सांस्कृतिक कार्यक्रम व्हीया। ईं बीचे जयपुर मांय राजभवन मांय शुक्रवार ने सिंज्या एट होम कार्यक्रम व्हीयो। कार्यक्रम मांय राज्यपाल, मुख्यमंत्री समेत कैबिनेट रा दूजा मंत्री भेळा व्ह्या। इण रे अलावा जन नुमाइंदां, आला अहलकार अर समाज रा न्यारा-न्यारा तबका रा खास लोग मौजूद रिया।