प्रदेश मांय ईं चौमासा मांय हाल तांई सामान्य ऊं 99 फीसदी बत्ती बिरखा व्हे चुकी है। राज्य मांय औसतन 174 मिलीमीटर बारिश व्हे है। ईं रे मुकाबले हाल तांई 374 मिलीमीटर पाणी बरस ग्यो है। ईं बीचे न्यारी-न्यारी ठौड़ां चौमासा री बिरखा व्हे रही है। मौसम विभाग रे मुजब लारला चौबीस घंटा मांय सब ऊं बत्ती 9 सेंटीमीटर बिरखा बारां ज़िला रा अटरू मांय व्ही। बारां रा ही किशनगंज, शाहबाद, मांगरोल, छबड़ा अर छीपाबड़ौद मायं ई चोखो मेह व्ह्यो। ईं सागे ई कोटा ज़िला रा रामगंजमंडी, मंडाना, सांगोद, झालावाड़ ज़िला रा मनोहरथाना, खानपुर अर अकलेरा मांय ई जम र पाणी बरस्यो। बूंदी, झुंझुनूं, अलवर, करौली, सवाईमाधोपुर अर सिरोही मायं ई बरसात रा समाचार है। चोखी बिरखा ऊं राज्य रा बंधां अर तळावां मांय लगातार पाणी आ रह्यो है। आज बीसलपुर बंधो पूरो भर्यां पाछे इण रो एक दरूजो खोल र बत्तो पाणी निकाळ्यो जा रह्यो है। मौसम विभाग आज 13 ज़िलां मांय बारिश रो येलो अलर्ट जारी कीनो है। काल जयपुर, भरतपुर, कोटा, उदयपुर अर बीकानेर संभाग रा कुछ हलकां मांय बिरखा रा आसार है। ईं बीचे मौसमी बीमारियां री शंका ने ध्यान राखता थकां राज्य सरकार सगळा ज़िलां मांय लार्वा ने पनपबा ऊं रोकण सारू जरूरी जतन कर रही है। पाली रा ज़िला कलेक्टर एल.एन. मंत्री जनता ऊं मौसमी बीमारियां ऊं बचाव सारू सावचेती राखण री अपील कीनी है।