प्रदेश मांय ईं चौमासा मांय घणखर ठौड़ां सामान्य ऊं बत्ती बिरखा व्ही है। हाल तांई 36 ज़िलां मांय असामान्य अर पांच ज़िलां मांय सामान्य ऊं बत्तो पाणी बरस्यो है। ई सागे ई तळावां, बंधां, कूड़ा-बावड़ियां अर नदी-नाळा मांय ईं बूता रो 68 फीसदी ऊं बत्तो पाणी भर ग्यो है। 693 मांय ऊं 176 बंधा पूरा भर ग्या है जद के 366 थोड़ा-घणा भर्या है। ईं बीचे लारला चौबीस घंटां मांय बिरखा रो ज़ोर थोड़ो कम पड़्यो है। इंर् बीचे सिरोही ज़िला मांय सोमवार ने केई ठौड़ां हल्की बरसात व्ही। आबू रोड़ मांय नदी मांय डूब जावण ऊं दो मोट्यारां री मौत व्हे ग्यी। मौसम विभाग सोमवार ने जोधपुर संभाग रा कुछ हलकां मांय हल्की ऊं मझला दर्जा री बिरखा रा आसार जताया है। चित्तौड़गढ़, प्रतापगढ़, बांसवाड़ा, डूंगरपुर अर उदयपुर ज़िलां मांय बरसात रो येलो अलर्ट जारी करी ज्यो है। ईं बीचे प्रदेश मांय लारला दिनां व्ही भारी बारिश पाछे न्यारी-न्यारी ठौड़ां पाणी भरण री समस्या पैदा व्हे ग्यी है जिण ने काडबा सारू प्रशासन ज़रूरी प्रबंध कर रह्यो है। श्रीगंगानगर मांय सोमवार न शहर रा खास नाळां री साफ-सफाई रो अभियान सरू करी ज्यो। नगर परिषद् रा आयुक्त रविन्द्र सिंह यादव बतायो के अभियान रे दौरान नाळां रा बहाव हलका मांय ज़मी माथे गैर कानूनी कब्जा हटाया जावेला।