प्रदेश मांय आवता हफ़्ता केई ठौड़ां घणा कोहरा, शीतलहर अर करड़ी ठण्ड रो असर बण्यो रहवण री आस है। मौसम विज्ञान केंद्र जयपुर रा निदेशक राधेश्याम शर्मा मुजब आवता दो-तीन दिनां मांय कमती रा तापमान मांय और कमी व्हे सके है। उत्तराद ज़िलां मांय शीतलहर रो असर बण्यो रहवेला जद के कुछ शहरां मांय बत्ती रो तापमान सामान्य दो ऊँ पांच डिग्री कम रहवण ऊँ ‘कोल्ड-डे’ री हालात बणी रह सके है। नुवां साल मांय व्ही मावठ ऊँ तापमान मांय 7 डिग्री सेल्सियस तांई कमी दर्ज करी ज्यी है। ई बीचे दीतवार ने अलवर, झुन्झुनू, करौली, धौलपुर, भरतपुर, कोटा, बीकानेर अर जयपुर समेत केई ठौड़ां घणो कोहरो छायी ज्यो रियो। वठे ई सिरोही, सीकर, चूरू, झुन्झुनू अर अलवर मांय शीतलहर रो प्रकोप बण्यो है। सीकर रा फतेहपुर मांय कमती रो तापमान एक दशमलव एक डिग्री सेल्सियस रियो। लूणकरणसर अर माउंटआबू मांय रात रो पारो 2 दशमलव 8 डिग्री सेल्सियस रिकॉर्ड व्ह्यो। पाली, चूरू, झुन्झुनू अर वनस्थली मांय कमती रो तापमान औसत 4 डिग्री सेल्सियस रे आरे-सारे दर्ज करी ज्यो। भीलवाड़ा, जोधपुर अर डूंगरपुर रे अलावा सगळी ठौड़ां कमती रो तापमान 10 डिग्री सेल्सियस ऊँ नीचे मापी ज्यो।