प्रदेशभर मांय सुख-समृद्धि, भाई-चारा अर रोशनी रा तिवांर दिवाळी रो उमाव छायो है। लोग कारोबारी ठिकाणा अर घरां मांय लक्ष्मी अर गणेश पूजन री तैयारियां मांय लाग्या है। लोग घर-परिवार अर साथियां रे साथै तिवांरी खुशियां रो आनंद ले रह्या है। चप्पा-चप्पा मांय फैल्यो उजियारो अंधकार माथे प्रकाश री जीत रो संदेश देवे। जठे बजार मोवणी सजावट अर रंग-बिरंगी रोशनी री सतरंगी आभा ऊँ सराबोर है। वठे ई घरां ने दीयां, झालरां, लड़ियां, रंगोली, फूलां अर बंदनवार ऊँ सजायी ज्या है। मिन्दरां अर धार्मिक ठौड़ां माथे मनभावन झांकियां सजाई ज्यी है। संवारा ऊँ ई भक्त सिरधा अर आस्था रे सागे दर्शन सारू पूग रह्या है। बाजारां मांय सोमवार ने ई दिनभर चहल-पहल री। राजधानी जयपुर रा परकोटा हलका री सजावट अर रोशनी ने निहारण सारू स्थानीय रहवासियां रे साथे ईं घणी तादाद मांय सैलाणी पूग्या है। सैलाणी इण ने कैमरां मांय कैद कर ने खुश व्हे रह्या है। उठिने उदयपुर मांय ई सैलाणियां रो हुजूम उमड़्यो है। बाड़मेर ज़िला मांय ई रोशनी रा तिवांर माथे उमंग अर हरक रो माहौल है। शहर रे साथै ई गांवांई हलकां ई उजाळा ऊँ जगमगा रीया है। म्हाणा खबरनवीस बतायो के सरहद माथे बीएसएफ जवानां सरहदी चौकियां ने मोवणी दीप माळा ऊँ सजाया है। दीपोत्सव माथे कानून बन्दोवस्त ने देखता पुलिस टीमां सावचेती ऊँ गश्त कर री है। पटाखां अर आतिशबाजी ऊँ होवण वाळां प्रदूषण ने देखता राजस्थान राज्य प्रदूषण नियंत्रण मंडल अर न्यारा-न्यारा सामाजिक संगठनां कानी ऊँ पर्यावरण अनुकूल अर हरित दिवाळी मणावण री अरज करी ज्यी है। कार्तिक अमावस माथे भगवान महावीर स्वामी ने निर्वाण री प्राप्ति व्ही ही। ई मौके जैन मंदिरां मांय काले मोक्ष कल्याणक दिवस मनायो जायेला। वहीं दीपोत्सव री कड़ी मांय 22 अक्टूबर ने गोवर्धन पूजा अर अन्नकूट रो आयोजन व्हेला। इण रे आगले दिन भाईदूज मनायी जायेला।