प्रदेशभर मांय सिरधा अर भक्ति रे सागे श्रीकृष्ण जन्माष्टमी रो पर्व मनायो जा रह्यो है। इण मौके मिन्दरां मांय खास श्रृंगार कर्यो गयो है। इण मौके झाकी, रासलीला, दही हांडी, नृत्य संगीत अर भजन संध्यावां सूं माहौल भक्तिमय व्हे रह्यो है। जयपुर रा श्री गोविन्ददेव जी मिन्दर मांय जयकारां अर कीर्तन रे सागे जन्मोत्सव मनायो जा रह्यो है। सीकर मांय खाटूश्यामजी, करौली रा मदन मोहन, उदयपुर रा जगदीश मिन्दर अर अलवर रा रंगजी मिन्दर मांय भी सिराधालूआं रो जमावड़ो निजर आ रह्यो है। चित्तौड़गढ़ रा श्री सांवलिया सेठ कृष्णधाम ने फूलां अर रंग-बिरंगी रोशनी सू सजायो गयो है। म्हाका खबरनवीस बताया के प्रदेश रे सागे ही दूजां राज्यां सूं भी बड़ी तादादा मांय श्रिरधालू दर्शन खातर पूग रह्या है। बालोतरा अर सिरोही रा पिण्डवाड़ा अर रोहिड़ा समेत केई दूजी ठौड़ां माथे जन्माष्टमी रे मौके महिलावां परम्परागत रूप ऊं तलाब पूजन कर्यो। चूरू रा प्राचीन कृष्ण मिन्दर मांय मेळो राख्यो गयो है। वठिने नाथद्वारा रा श्रीनाथ जी मिन्दर मांय भी धूमधाम सूं जन्माष्टमी रो उत्सव मनायो जा रियो है। इण मौके शोभायात्रा भी काडी जा री है। रात 12 बज्यां श्रीकृष्ण प्राक्टय रे सागे जन्माष्टमी रो पर्व मनायो जावेला।