प्रदेशभर मांय बत्ती ठौड़ां माथे चौमासा री बारिश रो दौर जारी है। राजधानी जयपुर मांय दीतवार ने सुवांरे सूं ही बादळा छया रिया अर रिमझिम पाणी बरस्यों। गंगानगर अर हनुमानगढ मांय तेज बरसात व्ही, वठिने डीग मांय भी दोपहरा पाछे हल्को मेह बरसबा री खबर है। उठिने पाली मांय घटाटोप मेह बरस्बा सूं सड़का माथे पाणी भर ग्यो। वठिने बांसवाड़ा ज़िला मांय भी तेज मेह बरसबा रो दौर जारी है। ज़िला रा घाटोल हलका मांय मूसलाधार पाणी पड़बा सूं ठौर-ठौर पाणी भर ग्यो। इण रे इतर सिरोही, उदयपुर, डूंगरपुर, चित्तौडगढ, दौसा, बारां, समेत केई ठौड़ा सूं मेह बरसबा रा समचार है। मौसम केन्द्र जयपुर आज प्रदेश मांय केई हलकां मांय भारी बारिश रो अलर्ट जारी कर्यो है। केन्द्र रे मुजब राज्य रा तीस ज़िला मांय कठिने भारी तो कुछ एक ठौड़ां बत्ती ऊं बत्ती बिरखा होबा रो अन्दाजा है। इण बीच टोंक ज़िला रा बीसलपुर बांध मांय लगातार व्हे री पाणी री आवक सूं उण रा जल स्तर मांय बढोतरीव्ही है। बांध मांय करीब तीन सौ चौदह आर.एल मीटर तांई पाणी भर ग्यो है। बतायो जावे है के बीसलपुर बांध सूं जयपुर, अजमेर, टोंक, किशनगढ़ अर ब्यावर शहरां मांय पीबा रो पाणी पूगायो जावे है। मौसम मेहकमो अन्दाजो जतायो है के पूर्वी राजस्थान री बत्ती ठौड़ा मांय आवता दो हफ्ता तांई चौखो मेह बरसेला अर सामान्य सूं बत्ती बिरखा व्हे सके है। वठिने पश्चिमी राजस्थान मांय भी झमाझम मेह बरसबा रा आसार है।