प्रदेशभर मांय दीपोत्सव रो उमाव छायो है। मंगलवार ने कुछ ठौड़ां गोवर्धन पूजा अर अन्नकूट रा आयोजन व्हे रह्या है। केई ठौड़ां ओ पर्व काले मनायो जायेला। नाथद्वारा रा श्रीनाथजी मंदिर मांय अन्नकूट उत्सव मांय भाग लेवण सारू घणी तादाद मांय सिरधालू पूग्या है। राजधानी जयपुर रा गोविंद देवजी मंदिर मांय काले अन्नकूट महोत्सव मनायो जायेला। गांवाई हलकां मांय गोवर्धन पूजा सारू पशुधन ने सजायी ज्या है। पाली मांय पुरानी रीत मुजब मंगलवार ने बैलां री पूजा करी जावे। म्हाणा खबरनवीस बतायो के वठे बैल दौड़ होड़ व्ही। ई मौके घणी तादाद मांय गांवा वाळां मौजूद रह्या। ईं बीचे दीवाळी रे पछे मंगलवार ने लोग एक-दूजा ने बधाई अर शुभकामनावां देवे। घणकरी ठौड़ां दिवाळी री रामा-श्यामा अर मेळ मुलाकात रो दौर चालतो रियो। केन्द्रीय कानून मंत्री अर्जुन राम मेघवाल बीकानेर मांय बीएसएफ रा जवानां ऊँ मिल ने वां ने दिवाळी री शुभकामनावां दी। लोकसभा अध्यक्ष ओम बिरला कोटा मांय लोगां ने दिवाळी री बधाई दी अर कह्यो के कोटा मांय हर हळका रो ध्यान राखता विकास कर्यो जायेला। दीपोत्सव री कड़ी मांय 23 अक्टूबर ने भाईदूज मनायी जायेला।
