प्रदेशभर मांय दिन अर रात रे तापमान मांय कमी सूं सुवांरे अर सिंज्यां गुलाबी सर्दी रो एहसास होवण लाग्यो है। मौसम केन्द्र जयपुर रे मुजब लारला 24 घंटां मांय केई शहरां मांय कमती तापमान 20 डिग्री सेल्सियस सूं नीचे दर्ज व्ह्यो। वठिने दिन मांय आसमान साफ रहणे सूं हळकी गर्मी रो एहसास बण्योड़ो है। राज्य रा एकमात्र पर्वतीय पर्यटन ठौड़ माउंट आबू मांय भी गुलाबी सर्दी रो असर देख्यो जा रह्यो है और ब्यौरो म्हाका खबरनवीस सूं। मौसम महकमा रे मुजब लारला दिनां व्ही बिरखा रे पाछे वातावरण मांय नमी अर उत्तर-पूर्वी हवावां रे कारणे राज्य रो तापमान सामान्य सूं 2 सूं 7 डिग्री तांई नीचे चाल रह्यो है। सुखे मौसम रे बीचे पारो गिरणे सूं ठंड रो असर साफ महसूस कर्यो जा रह्यो है। ध्यान जोग है कि इण बार सर्दी रो मौसम सामान्य सूं थोड़ा पैले दस्तक दे सके है। नवंबर-दिसंबर मांय मावठ अर शीतलहर रो दौर तेज होणे रा आसार हैं।