प्रदेशभर मांय चाल रिया मतदाता सूचियां रा खास गहन पुनरीक्षण कार्यक्रम रे तैत घर-घर सर्वे करने जाणकारी हासिल करी जाए री है। बीएलओ कानी ऊं मतदातावां ऊं मिलने गणना प्रपत्र रो वितरण डेटा भेळा करण सारू करयो जावे। काले ऊं सरू व्हीया एसआईआर रे तैत पात्र मतदातावां ऊं नुवा रंगीन फोटो अर पूरा भर्या गणना प्रपत्र लेर अद्यतन मतदाता सूची रो डाटा तैयार कर्यो जावे। जनजातीय बाहूल डूंगरपुर जिला मांय एसआईआर रे तैत बुधवार ने वाल्मिकी समाज रा लोगां री कॉलोनियां मांय बीएलओ दौरो करने जाणकारी ली। जिला कलेक्टर अंकित कुमार सिंह लोगां ऊं बीएलओ री मदद करण सारू अरज करी। झुंझुनूं ज़िला रा कोई साढे 19 लाख मतदातावां रा सत्यापन ने लेर बीएलओ घर-घर पूग रिया है। जिला कलेक्टर डॉ. अरूण गर्ग बतायो के 4 दिसम्बर तांई चालण वाळा अभियान रे तैत सगळा पात्र मतदातावां ने सूची मांय जोड़ण री कोशिश करी जाएला। श्री गर्ग बतायो के मतदातावां री समस्यावां रा निपटारा सारू 1 9 5 0 रे साथे ही स्थानीय हेल्पलाइन नम्बर ई सरू कर्या जाएला। कोटपूतली-बहरोड़ जिला कलेक्टर प्रियंका गोस्वामी मतदातावां ऊं अभियान मांय बत्ती ऊं बत्ती भागीदारी निभावण री अरज करी।