प्रदेशभर मांय आवता तीन-चार दिन बारिश रो दौर जारी रह सके है। मौसम विभाग थावर ने चौबीस ज़िलां मांय बिरखा रो यलो अलर्ट बतायो है। वठिने 18 अगस्त ने उदयपुर अर सिरोही रा कुछ एक हलकां मांय छितरायी तो कठे-कठे भारी मेह बरस सके है। राजधानी जयपुर, सिरोही अर पाली मांय भी दोपहर पाछे बारिश रो दौर चाल्यो। बाड़मेर सूं म्हाका खबरनवीस बताया के चौखो मेह बरस्बा सूं लोगां ने गर्मी सूं राहत मिली है। काल अठे बत्तो तापमान 40 डिग्री सेल्सियस रे पार दर्ज कर्यो ग्यो। इण बीच लारला चौबीस घंटां मांय उदयपुर रा गोगुन्दा मांय सब ऊं बत्तो 7 सेंटीमीटर मेह बरस्सो। भरतपुर रा पहाड़ी, झालावाड़ रा गंगधार, राजसमंद रा नाथद्वारा, कुम्भलगढ़ अर कोटा रा सांगोद मांय भी मूसलाधार मेह बरस्यो। जालौर मांय भी तड़के रूक-रूक र तेज़ बारिश व्ही। वठिने बाड़मेर, जोधपुर, जालौर, बांसवाड़ा, झालावाड़, बारां, डूंगरपुर मांय भी कुछ एक ठौड़ां माथे 2 सूं 4 सेंटीमीटर बरसात दर्ज व्ही। प्रदेश रा जलस्त्रोत 77 फीसदी तांई भर ग्या हैं, वठिने छोटा-बड़ा 693 बांधा मांय सूं 2 सौ 74 बांध लबालब भर ग्या अर 280 मांय भी थोड़ो पाणी भर्यो है। बारिश रा सुहावणा मौसम मांय एक साथ केई छुट्टियां आबा सू प्रदेश रा पर्यटन री ठौड़ां माथे सैलानियां री खासी भीड़ देखी जा री है। राजधानी जयपुर मांय भी छुट्टियां रो आनन्द लेबा खातर पडौसी राज्यां सूं सैलाणी अठे पूग रह्या है। वठिने सिरोही रा माउंटआबू मांय भी सैलाणियां री भारी भीड़ है। इण ने देखता थकां प्रशासन आबू रोड़ माउंट आबू जाबा वाळी बड़ी अर भारी गाड़ियां माथे 20 अगस्त तांई रोक लगा दी है।