पौष माह बीतबा रे सागे ई आ दिनां प्रदेशभर मांय करड़ी सर्दी रो असर थोड़ो कम व्हे रह्यो है। बीत्या कुछ एक दिनां सूं तापमान मांय मामूली बढ़ोतरी सूं लोगां ने राहत मिली है। हालांकि शेखावाटी हलका रा ज़िलां मांय हाल भी कमती रो तापमान 5 डिग्री सेल्सियस सूं नीचे चाल रह्यो है। मौसम महकमां रे मुजब बीत्या 24 घंटां मांय सब ऊँ कम 1 दशमलव 4 डिग्री सेल्सियस तापमान बीकानेर रा लूणकरणसर मांय दर्ज कर्यो गयो। विभाग रे मुजब राज्य रा बत्ता इलाकां मांय इण हफ़्ता मौसम सूखो रह सके है। इण रे पछे भरतपुर अर जयपुर संभाग मांय कुछ एक ठौड़ां माथे मावठ पढ सके है। महकमो आवता हफ़््ता उत्तरी हलकां मांय कठे-कठे ठण्डी हवावां चालबा अर कोहरा रा हालात बणवा रो अंदेशो जतायो है वठिने सरहदी जिलां अर शेखावाटी हलका मांय बुधवार ने भी केई ठौड़ां माथे कोहरा रो असर रियो। म्हाणी हनुमानगढ़ खबरनवीस बतायो के ज़िला मांय कोहरा री वजह सूं लोगां ने गाड़िया चलावा मांय परेशानी व्ही। इण बीच, माउंट आबू मांय पड़ री सर्दी रो आनंद लेबा खातर राजस्थान अर पड़ौसी राज्य गुजरात सूं बड़ी संख्या मांय सैलानी पूग रह्या है।