पाकिस्तान रे खिलाफ़ व्ही करगिल री लड़ाई मांय जीत हासिल करण री काल 26वीं वर्षगांठ है। साल 1999 मांय इण ई दिन भारत री फौज ऑपरेशन विजय री कामयाबी रो ऐलाण कीनो हो। ई मौके लद्दाख रा द्रास मांय केन्द्रीय युवा मामलात् अर खेल मंत्री डॉ. मनसुख मांडविया री अगुवाई मांय पदयात्रा निकाळी जावेला। इंर् सागे ई देशभर मांय न्यारा-न्यारा कार्यक्रम राख्या जावेला। हर साल 26 जुलाई ने करगिल विजय दिवस मनायो जावे है। ओे दिन वां अमर जांबाज़ जवानां री बहादुरी ने सलाम करण रो दिन है, जो करीब 18 हजार फीट री ऊंचाई माथे पाकिस्तानी घुसपैठियां रे खिलाफ़ लड़्या हा। आ फौजी इतिहास री मुश्किल लड़ाइयां मांय ही, जो इतरी ऊंचाई अर तोलोलिंग अर टाइगर हिल सरीखा मुश्किल हलकां मांय लड़ी ज्यी ही। फौज़ियां री अद्भुत हिम्मत ने समर्पित ईं दिन केई आयोजन व्हे है। ईं सिलसिला मांय शुक्रवार ने द्रास रा लामोचन व्यू पॉइंट माथे खास कार्यक्रम राख्यी ज्यो। राजस्थान विधानसभा परिसर मांय ई अमर शहीदां री याद मांय शौर्य वाटिका बणायी ज्यी है। विधानसभा अध्यक्ष वासुदेव देवनानी इण रो उद्घाटन कीनो। ईं मौके सिंदूर रो पौधो रोप र बलिदानी फौज़ियां ने याद करी ज्या अर वीरांगनावां रो मान करी ज्यो।