दीवाळी रो पांच दिन रो त्यौहार धनतेरस सागे थावर ने सरू व्हेला। धनतेरस रे मौके सोना-चांदी रा सिक्का, गहणा अर बर्तन री खरीदी री रीत है। ईं रा आगला दिन रूप चौदस यानि छोटी दीवाळी मनाई जावेला। ईं दिन महिलावां रे सजबा-संवरबा री रीत है। ईं पाछे अमावस 20 अर 21 अक्टूबर ने दो दिन रेहवण रे कारण न्यारी-न्यारी ठोडां लक्ष्मी पूजन सोमवार अर मंगलवार ने कर्यो जावेला। 22 अक्टूबर ने गोवर्धन अर अन्नकूट मणायो जावेला, जदके 23 अक्टूबर ने भाईदूज सागे दीवाळी रो त्यौहार पूरो व्हेला। दीवाळी रे मौके बाज़ारां, दुकानां, घरां अर दफ्तरां मांय सोहवणी सजावट करी ज्यी है अर लोग नुवा कपड़ा, जेवर, बर्तन, इलेक्ट्रोनिक सामान अर सजावटी चीजां री खरीदी करण लाग्या है। दीवाळी रे मौके मोटरगाड़ियां री ई खूब बिक्री व्हे रही है अर लोगां ने जीएसटी बचत उत्सव रो फायदो ई मिल रह्यो है। दौसा री जेल मांय ईं दीवाळी श्यालावास विशेष केंद्रीय कारागार रा बंदी पर्यावरण-अनुकूल दीपक बणा रह्या है। जेल अधीक्षक पारस जांगीड़ बतायो के बंदी मिट्टी अर गोबर काम ले र पारंपरिक दीया बणा रह्या है। वे कह्यो के दीवाळी रे दिन जेल रा आंगणा मांय अ ही दीया जोया जावेला, जो कैदियां री मेहनत रो मान व्हेला। जेल प्रशासन रे मुजब इण रो मकसद कैदियां मांय सकारात्मकता, काम करण री लगन अर कलात्मकता ने बधावो देवणो है। आवता दिनां मनाया जावण वाळा दीवाळी अर दूजा त्यौहारां ने ध्यान राखता थकां पाली ज़िला रा तखतगढ़ मांय नगरपालिका री ओर ऊं लाय बुझावण री मॉक ड्रिल करी ज्यी। ईं दौरान दमकल गाड़ियां रो रख-रखाव तैय करण सागे ई कर्मचारियां ने सिखावण दीरीजी। सवाईमाधोपुर रा सरकारी अस्पताल मांय ई लाय बुझावण रो अभ्यास करी ज्यो। ज़िला कलेक्टर काना राम बतायो के ईं अभ्यास मांय पुलिस, प्रशासन अर दमकल समेत न्यारा-न्यारा महकमां री तैयारियां री परख करी ज्यी।