पश्चिमी विक्षोभ अर प्रदेश रा उतराद-आतूणी हलकां मांय परिसंचरण तंत्र रा असर ने ध्यान राखता थकां मौसम विभाग थावर ने बारिश व्हेवण सारू चेतायो है। जोधपुर अर बीकानेर संभाग सारू येलो अर जयपुर, कोटा अर उदयपुर संभाग सारू ऑरेंज अलर्ट जारी करी ज्यो है। राज्य मांय आंधी-बारिश चालता रेहवण अर 20 जून ऊं इण मांय और बधोतरी रा आसार है। इण ऊं पारो 3 ऊं 4 डिग्री सेल्सियस तांई उतरण सागे लू ऊं आराम मिलण री संभावना है। ईं बीचे थावर ने बांसवाड़ा, हनुमानगढ़, झालावाड़, बारां अर श्रीगंगानगर समेत केई ठोड़ां बादळां री गाज सागे बिरखा व्ही। सादुलशहर रा मोरजंडा मांय ओळा पड़्या। ईं बीचे हनुमानगढ अर चूरू मांय थावर जबरदस्त गर्मी रो असर रह्यो। म्हाणा चूरू खबरनवीस बतायो के ते़ज गर्मी ऊं परेशान लोग बेसब्री ऊं चौमासा री बिरखा री बाट देख रह्या है।