पशुपालन मंत्री जोराराम कुमावत बुधवार ने जयपुर मांय मोबाइल वेटरनरी यूनिट रो कॉल सेंटर जनता ने सूंप्यो। ईं मौके वे कह्यो के मोबाइल वेटरनरी यूनिट घर-घर जा र मांदा ढांढा रो ईलाज करेला। हर मोबाइल वेटरनरी यूनिट मांय एक डॉक्टर, एक पशुधन सहायक अर एक ड्राइवर व्हेला। कार्यक्रम मांय पशुपालन राज्य मंत्री जवाहर सिंह बेढम ई मौजूद रह्या। पशुपालन विभाग ऊं मिली जाणकारी रे मुजब हर 1 लाख ढांढा परां एक मोबाइल वेटरनरी यूनिट काम करेला।प्रदेश मांय 536 मोबाइल वेटरनरी यूनिट रे मार्फत ढांढा अर ईलाज री व्यवस्था करी ज्यी है। कॉल सेंटर माथे ढांढा रा 10 डॉक्टर अर तकनीकी चिकित्सा कर्मचारी मौजूद रेहवेला। ढांढा मांय सामान्य बीमारियां रा ईलाज सारू टेली मेडिसिन री व्यवस्था करी जावेला। ई रे अलावा पशु प्रबंधन अर पोषण रा बारा मांय ई राय दी जावेला। कॉल सेंटर रा हेल्प लाईन नंबर 1962 माथे फोन कर र पशुपालक आं सेवावां रो फायदो ले सके है। सवाईमाधोपुर जिला मांय ईं योजना रा तैत पशुपालन विभाग रा संयुक्त निदेशक डॉ. राजीव गर्ग ढांढां रा अस्पताल ऊं सात वेटरनरी मोबाइल यूनिट ने रवाना कीनी। बांसवाड़ा रा जिला कलेक्ट्री परिसर मांय राख्यी ज्या कार्यक्रम मांय जिला कलेक्टर ऑनलाइन 1962 मोबाइल वेटरनरी सेवा जनता ने सूंपी।