परवन वृहद् सिंचाई परियोजना रा तैत डूब हलका मांय आवण वाळा झालावाड़ अर बारां ज़िलां रा 27 गांवां रा बच्योड़ा मकानां सारू मुआवज़ो दियो जावेला। आं मांय झालावाड़ ज़िला री खानपुर अर अकलेरा तहसीलां रा 17 अर बारां जिला री छीपाबड़ौद तहसील रा 10 गांव भेळा है। ईं सारू कोई 37 करोड़ रुप्या मंजूर करी ज्या है। जल संसाधन मंत्री सुरेश सिंह रावत बतायो के ईं रा असर वाळा पिरवारां ने बेगो ई मुआवज़ो दियो जावेला। आं रा 1 हजार 90 मकानां सारू मुआवज़ो दियो जावेला। परियोजना रा तैत पेली ई आं ज़िलां रा 47 गांवां री डूब हलका मांय आयी जमीं अर 29 गांवां रा थोड़ा-घणा अर पूरा डूब प्रभावित मकानां सारू अनुदान दियो जा रह्यो है। हालांकि चारागाह, सिवायचक अर वन भूमि माथे बण्या मकानां रो मुआवज़ो नी दियो जावेला। जल संसाधन मंत्री मंगलवार ने किशनगढ़ कने बांदरसिंदरी मांय माधव सरोवर ने और बेहतर बणावण रा कामां रो जायज़ो लीनो। वे अहलकारां ने सगळा काम आवतो महीनो पूरा व्हेवण तांई खत्म करण रा हुकम दीना।