नौरता रा आठवां दिन मंगलवार ने महाअष्टमी रे मौके देवी दुर्गा रा महागौरी रूप री पूजा करी ज्यी। ईं मौके राष्ट्रपति द्रौपदी मुर्मू , प्रधानमंत्री नरेन्द्र मोदी अर केंद्रीय गृह मंत्री अमित शाह जनता ने शुभकामनावां दीनी है। प्रदेश रा देवी मंदिरां मांय मोटी तादाद मांय जातरू पूग्या। नामी शक्तिपीठां अर मिन्दरां मांय धार्मिक अनुष्ठान, पूजा-अर्चना अर यज्ञ कुंडां मांय आहुतियां दीरीजी। डूंगरपुर रा आशापुरा अर विजवामाता शक्तिपीठ, बाड़मेर मांय वीरातरा रा वांकल माता अर करौली रा कैला देवी मिन्दर समेत न्यारा-न्यारा मिन्दरां मांय मोटी तादाद मांय जातरू पूग्या। पाली रा करणी माता मिन्दर मांय भक्त कन्यावां रा पग धोया अर चांदी री थाळी मांय जीमायी। कैलादेवी मांय चाल रह्या नौरता रा मेळा मांय मंगलवार ने दुर्गाष्टमी रे मौके राजस्थान समेत न्यारा-न्यारा राज्यां रा जातरू माता रा दर्शन कर र मनौती मांगी। मुख्यमंत्री भजन लाल शर्मा ब्यावर रा जैतारण मांय कन्या पूजन कीनो। जोधपुर मांय उपमुख्यमंत्री दिया कुमारी दुर्गाष्टमी रे मौके 101 कन्यावां रो पूजन कीनो। वे कन्यावां ने देवी रो रूप बताता थकां वां रा पग धोया, वां ने जीमायी अर भेंट दीनी। ईं दौरान दीया कुमारी प्रधानमंत्री नरेंद्र मोदी रा ’बेटी बचाओ बेटी पढ़ाओ’ अभियान री सराहवणा कीनी अर बेटा-बेटियां ने बराबर मौका देवण सारू कह्यो। सवाईमाधोपुर मांय ई घरां अर मिन्दरां मांय कन्या पूजन अर गरबा-डांडिया रा आयोजन राख्यी ज्या।