नागौर ज़िला मांय भक्त शिरोमणि मीरा बाई री कर्मभौम मेड़ता ने सैलाणीं ठौड़ रा मकसद ऊं विकसित कर्या जायेला। उपमुख्यमंत्री दिया कुमारी दीतवार ने मेड़ता मांय मीरा बाई री जयंती रे मौके व्ह्या जळसा मांय बोलता कह्यो के मीरा भाई री आध्यात्मिक विरासत ने सहेजण सारू पैनोरमा परियोजना ने और शानदार रूप दियो जायेला। इण लाइट एण्ड साउंड शो ने ऊचां तकनीकी थर माथे अपग्रेड कर्या जायेला, जिण ऊं देश-विदेश ऊं आवण वाळी सैलाणियां ने मीरा बाई रा जीवन दर्शन अर भक्तिगाथा रो अनुभव कर्यो जा सके। उपमुख्यमंत्री बतायो के मीरा बाई मिन्दर परिसर मांय भक्ति आन्दोलन माथे आधारित संग्रहालय अर संगीत सभागार री डीपीआर तैयार व्हे चुकी है। वणा कह्यो के ई हलका मांय कोई एक हजार करोड़ रिप्यां री लागत ऊं न्यारी-न्यारी विकास परियोजनावां चलायी जावे। दिया कुमारी कह्यो के मेड़ता समेत प्रदेश री धार्मिक ठौड़ां ने पर्यटन सर्किट बणा र विकास रा काम कराया जायेला।