दौसा-मनोहरपुर सड़क हादसा रे कारण मरण वाळां रा पिरवार वाळां ने 2-2 लाख अर ज़ख्मी लोगां ने 50-50 हज़ार रुप्या री मदद दी जावेला। प्रधानमंत्री नरेन्द्र मोदी हादसा माथे गहरो दुःख जताता थकां राष्ट्रीय राहत कोष ऊं आ रकम देवण रो ऐलाण कीनो है। राष्ट्रपति द्रौपदी मुर्मू अर केई नेता दौसा-मनोहरपुर सड़क हादसा माथे गहरो दुःख जतायो है। राज्यपाल हरिभाऊ बागड़े, मुख्यमंत्री भजनलाल शर्मा अर विधानसभा अध्यक्ष वासुदेव देवनानी ई ईं हादसा माथे शोक जताता थकां मरण वाळां रा पिरवार वाळां रे प्रति संवेदना जतायी। बासड़ी चौराहा कने बुधवार ने तड़के एक पिकअप अर कंटेनर री टक्कर रे कारण व्ह्या हादसा मांय ग्यारह जणा री मौत व्हे ग्यी अर ग्यारह जणा जख्मी व्हे ग्या। हादसा मांय घणा ज़ख्मी आठ जणां ने जयपुर रा सवाई मानसिंह अस्पताल मांय भर्ती करायी ज्या है। हादसा रा शिकार लोग उत्तरप्रदेश रा एटा रा रेहवासी हा जो खाटूश्याम जी रा दर्शन कर र पाछा आ रह्या हा। दूजी कानी बीकानेर रा गजनेर हलका मांय इंदिरा गांधी नहर मांय डूब जावण ऊं तीन जणा री मौत व्हे ग्यी। पुलिस रे मुजब वे तीन ई जणा कोडमदेसर तळाव भैरुजी रा दर्शन करण सारू गया हा, जठे गेला मांय तळाव मांय डूब ग्या। पाली रा गुढा एंदला हलका रा कीरवा गांव मांय बुधवार ने दो गाड़ियां री टक्कर रे कारण 40 जणा जख्मी व्हे ग्या, ज्यां रो गुढ़ा एंदला अर गुंदोज रा अस्पतालां मांय ईलाज कर्यो जा रह्यो है।