देश 25 दिसम्बर ने पैली रा प्रधानमंत्री अर भारत रत्न अटल बिहारी वाजपेयी ने वां री 101वीं जयंती माथे सिरधा भाव ऊँ याद करे। अटल बिहारी वाजपेयी री जयंती गरूवार ने देशभर मांय सुशासन दिवस रा रूप मांय मनायी ज्यी। ईं मौके व्ह्या न्यारा-न्यारा कार्यक्रमां मांय श्री वाजपेयी ने श्रिद्धांजलि दीरीजी अर राष्ट्र विकास मांय वां रा योगदान ने याद करी ज्या। राष्ट्रपति द्रौपदी मुर्मू, उपराष्ट्रपति सी.पी. राधाकृष्णन अर प्रधानमंत्री नरेंद्र मोदी नुवी दिल्ली मांय सदैव अटल माथे वां री समाधि माथे फूल अर्पण कर्या। पछे प्रधानमंत्री लखनऊ मांय श्री वाजपेयी ने समर्पित राष्ट्रप्रेरणा स्थल रो उद्घाटन कर्यो। तीस करोड़ रुपये री लागत ऊँ बणायी ज्या अर 65 एकड़ रा मोटा हलका मांय फैल्यो ओ परिसर एक स्थायी राष्ट्रीय संपत्ति रा रूप मांय बणायी ज्यो है। ईं मौके व्ह्ी जनसभा मांय बोलता प्रधानमंत्री कह्यो के सरकारी योजनावां रो 100 फीसदी फायदो पूगावणो वां री सरकार रो मकसद है अर अवै करोड़ो गरीबां ने इण रो फायदो मिल रह्यो है। सुशासन दिवस माथे राज्य थर रो जळसो जयपुर मांय व्ह्यो जठे मुख्यमंत्री भजन लाल शर्मा अहलकारा अर कार्मिका ने सुशासन री शपथ दीरायी। ईं मौके मुख्यमंत्री कह्यो के प्रधानमंत्री नरेन्द्र मोदी रा ‘न्यूनतम सरकार, अधिकतम सुशासन’ रा मंत्र ने साकार करण सारू सगळा ने निष्ठा अर समर्पण साथै कोशिश करणा चाहिजे। प्रदेशभर मांय ई सुशासन दिवस माथे न्यारा-न्यारा कार्यक्रम व्ह्या। ज़िला थर रा आयोजनां मांय खास जळसा रो सीधो प्रसारण दिखायी ज्यो। जालौर मांय मुख्य सचेतक जोगेश्वर गर्ग अटल बिहारी रा जीवन माथे रोशनी डालता वां रा जीवन ऊँ सीख लेवण री अरज करी। ईं मौके ज़िला पुस्तिका रो विमोचन करी ज्यो। बाड़मेर मांय घणी तादाद मांय जन नुमाइन्दा अर प्रशासनिक अहलकार भेळा व्ह्या। आदिवासी बाहुल सलूंबर मांय व्ह्या जळसा मांय ज़िला कलेक्टर अहलकारां ने लोगां ऊँ जुड़्या मामलां ने प्राथमिकता रे साथे निपटावण री अरज करी। स्वर्ण नगरी जैसलमेर मांय व्ह्या कार्यक्रम मांय ज़िला कलेक्टर प्रताप सिंह पैली रा प्रधानमंत्री रा चित्रांम माथे पुष्पांजलि अर्पण कर ने सुशासन री शपथ दीरायी।