देश शुक्रवार ने उन्हासी वो स्वतंत्रता दिवस मनायी ज्यो। प्रधानमंत्री नरेन्द्र मोदी दिल्ली मांय ऐतिहासिक लालकिला माथे राष्ट्रीय ध्वज फहरा र स्वतंत्रता दिवस जळसा री अगुवाई करी। लालकिला री प्राचीर ऊं राष्ट्र ने संबोधित करता प्रधानमंत्री ऑपरेशन सिंदूर रा जाबाज सैनिकां ने नमन कर्यो। वणां कह्यो के ऑपरेशन सिंदूर देश रा सशस्त्र बलां रा साहस अर शौर्य रो मजबूत साक्ष्य है। प्रधानमंत्री कह्यो के सरकार सशस्त्र बलां ने रणनीति तियार करण, लगस अर बगत तय करण री खुली छूट दी। देश रा बहादुर सैनिकां, दुश्मनां ने मुंहतोड जवाब दियो अर पाकिस्तान मांय सैकड़ों किलोमीटर मांय जा र आतंकवादियां रा ठिकाणा ने ध्वस्त कर्या। वणां कह्यो के पहलगाम आतंकी हमला ने ले र देश रा हर रहवासी मांय रोष हो अर ऑपरेशन सिंदूर वां रा रोष री ई अभिव्यक्ति ही। श्री मोदी कह्यो के भारत अबै फैसलो कर लियो है के लहू अर पाणी एक साथ नी बेवेला। वणां कह्यो के भारत परमाणु हमला री धमकी अबे बर्दाश्त नी करेला। प्रधानमंत्री कह्यो के भारत दुश्मनां ने करारों जवाब देवण सारू मजबूत हथियार प्रणाली- सुदर्शन चक्र मिशन सरू करेला। प्रधानमंत्री आत्मनिर्भर भारत ने विकसित भारत रो आधार थांबो बताया। वणां रक्षा, प्रौद्योगिकी, ऊर्जा, अंतरिक्ष अर विनिर्माण हलका मांय देश री प्रगति रो जिक्रो कर्यो। श्री मोदी जोर देवता कह्यो के मेड इन इंडिया हथियारां समेत स्वदेशी बूतां ऊं भारत निर्णायक अर स्वतंत्र कार्रवाई करण मांय सक्षम व्हीयो है। श्री मोदी एक लाख करोड़ रूप्या रा प्रधानमंत्री विकसित भारत रोजगार योजना सरू करण रो ऐलान कर्यो। प्रधानमंत्री ऐलान कर्यो के आवती दिवाळी तांई नेक्स्ट जेनरेशन जीएसटी सुधार सरू कर्या जायेला। इण रो मकसद रोज काम री चीजां माथे टैक्स री रेट कम करणो है। वणां कह्यो के सुधारां ऊं लोगां, काश्तकारां, मझला तबका ने मदद मिलेला अर आर्थिक गतिविधियां मांय तेजी आवेला। श्री मोदी कह्यो के भारत रा बजट रो मोटो हिस्सों आज ई पेट्रोल, डीजल अर गैस आयात माथे खर्च व्हे रियो है। वणां समुद्री संसाधनां रा दोहन सारू गहरा पाणी मांय खोज करण राष्ट्रीय मिशन बणावण रो ऐलान कर्यो। वणा कह्यो के सोलर, हाईड्रोजन अर परमाणु ऊर्जा रा हलका मांय पसारो कर्यो जायेला। श्री मोदी ने जोर दे र कह्यो के भारत री स्वतंत्रता री 100 वीं वर्षगांठ तांई देश रो लगस परमाणु ऊर्जा बूता मांय दस गुना बढवार करणो, ऊर्जा हलका मांय आत्मनिर्भता बधाणो अर स्थायी विकास मांय मदद करणो है। आपरा सम्बोधन मांय प्रधानमंत्री नरेन्द्र मोदी लारला सौ सालां उं देश सेवा रे प्रति राष्ट्रीय स्वयंसेवक संघ रा स्वयंसेवकां री प्रतिबद्धता री सराहना करी अर कह्यो के हजारों स्वयंसेवकां व्यक्ति निर्माण उं राष्ट्र निर्माण रा संकल्प रे साथे देश सारू आपरो जीवन समर्पित करयो। इण उं पैला प्रधानमंत्री राजघाट गया अर राष्ट्रपिता महात्मा गांधी ने श्रद्धांजलि अर्पण करी।