देश रा हर रेहवासी तांई बैंकिंग सुबीता अर सामाजिक हिफाजत री योजनावां पूगावणो तैय करण रा मकसद ऊं केन्द्र सरकार वित्तीय समावेशन सारू देशभर मांय अभियान चलायो है। वित्त मंत्रालय रा वित्तीय सेवा विभाग री ओर ऊं एक जुलाई ऊं चलायी ज्यो ओ अभियान 30 सितम्बर तांई चालेला। संतृप्ति अभियान री जाणकारी देवण सारू सोमवार ने जयपुर मांय राख्यी ज्यी प्रेस वार्ता मांय पत्र सूचना कार्यालय री अपर महानिदेशक ऋतु शुक्ला अभियान रा तैत कर्या जा रह्या वित्तीय समावेशन ऊं जुड़्या कार्यक्रमां री जाणकारी दीनी। राज्य स्तर री बैंकर्स समिति-एसएलबीसी री सोमवार ने जयपुर मांय व्ही प्रेस वार्ता रे दौरान बैंक ऑफ बड़ौदा रा महाप्रबंधक अर समिति रा संयोजक एम. अनिल आ जाणकारी दीनी। वे बतायो के अभियान रा तैत ग्राम पंचायतां मांय वित्तीय सेवावां मुहैया करावण सारू शिविर लगाया जा रह्या है। वे बतायो के अभियान रा तैत प्रधानमंत्री जन-धन योजना रा तैत खोली ज्या पण काम नी आ रह्या खातां रो ओजू सत्यापन करायो जा रह्यो है।