देश मांय मतदाता सूची विशेष गहन पुनरीक्षण – एसआईआर रा काम रा दूजा दौर रा तैत हाल तांई वोट देवण रा पात्र 50 करोड़ 85 लाख ऊं बत्ता लोगां ने गणना प्रपत्र दे दिया ज्या है। आ तादाद ईं दौर रा करीब 51 करोड़ मतदातावां रो 99 दशमलव सात-आठ फीसदी है। प्रदेश मांय ई एसआईआर रो काम जोर-शोर ऊं चाल रह्यो है। अजमेर दक्षिण विधानसभा क्षेत्र री विधायक अनिता भदेल चुनाव आयोग री ओर ऊं गणना प्रपत्र भरण री तारीख 11 दिसम्बर तांई बधावण रो स्वागत कीनो है।
विशेष गहन पुनरीक्षण कार्यक्रम रा तैत जागरुक मतदाता आरे-सारे रा लोगां ने ई गणना प्रपत्र भरण सारू प्रेरित कर रह्या है। पाली रा रेहवासी किशनराव कह्यो के वोटरलिस्टां ने साफगोई सागे बणावण सारू एसआईआर री प्रक्रिया ज़रूरी है। राज्य मांय सौ फीसदी काम पूरो करण वाळा बूथ लेवल अहलकारां-बीएलओ अर सुपरवाईजर्स रो मान कर्यो जा रह्यो है। डूंगरपुर मांय ज़िला निर्वाचन अधिकारी अंकित कुमार सिंह ऐड़ा 37 सुपरवाईजरां रो मान कीनो। जयपुर मांय जागरूक मतदाता जनतंत्र का प्रहरी मुद्दा माथे निबंध होड़ राख्यी ज्यी। कोटपूतली-बहरोड़ ज़िला मांय जवानपुरा रा पवन शर्मा वोट देवण रा हकदार सगळा लोगां ऊं बीएलओ री मदद करण री अपील कीनी।