देश मंगलवार ने पैली वाळा राष्ट्रपति डॉ. ए. पी. जे. अब्दुल कलाम ने वां री जयंती रे मौके सिरधाभाव सागे याद कीना । मिसाइल मेन रा नाम ऊं पिछाण्या जावण वाळा डॉ. कलाम 15 अक्टूबर 1931 ने तमिलनाडु रा रामेश्वरम मांय जन्म्या। डॉ. कलाम ऐयरोनॉटिकल इंजीनियरिंग मांय विशेषज्ञता हासिल कर र देश मांय पहलो उपग्रह छोडबा रो यान विकसित करण मांय खास काम कीनो। प्रधानमंत्री नरेंद्र मोदी डॉ. कलाम ने सिरधा भाव सागे याद करता थकां सोशल मीडिया पोस्ट रे जरिये कह्यो के डॉ. कलाम री सोच अर दूरदृष्टि ऊं भारत ने विकसित बणावण रो लक्ष्य हासिल करण मांय मदद मिलेला। ईं मौके प्रदेश मांय ई न्यारी-न्यारी ठोड़ां खास कार्यक्रम राख्यी ज्या। केकड़ी रा सरकारी कॉलेज मांय राष्ट्रीय सेवा योजना रा तैत खास कार्यक्रम राख्यी ज्यो, जदके महात्मा गांधी स्कूल मांय डॉ. कलाम रा आदर्शां अर वैज्ञानिक उपलब्धियां रा बारा मांय प्रदर्शनी लगायी ज्यी। पाली मांय डॉ. कलाम री तस्वीर माथे फूल चढा र वां ने याद करी ज्या। बाड़मेर मांय ईं मौके योग अर स्वास्थ्य जागरूकता कार्यक्रम राख्यी ज्यो। सवाईमाधोपुर मांय राख्यी ज्या कार्यक्रम मांय सामाजिक काम करण वाळा संगठनां री ओर ऊं न्यारा-न्यारा हलकां मांय बेहतरीन काम करण वाळां ने कलाम अवॉर्ड दे र नवाजी ज्या।