देश भर मांय सोमवार ने दिवाळी मनायी जावेला। रोशनी रा इण त्यौहार माथे घर-घर मांय सोहवणी सजावट करी जा रही है। बाजारां मांय त्यौहारी उच्छाव निजर आ रह्यो है। लोग पूजन सामग्री, मिठाइयां, दीपक समेत दूजी चीजां री खरीदारी कर रह्या है। धनतेरस सूं शुरू व्ह्या दीपोत्सव रो तिवार लारला बरस री भांत इण बगत भी 6 दिन रो रहवेला। दिवाळी रे पछे 22 अक्टूबर ने गोवर्धन पूजा अर अन्नकूट व्हेला। वठिने 23 तारीख ने भाईदूज मनायी जावेला। त्यौहारी श्रृंखला मांय दीतवार ने रूप चौदस अर छोटी दिवाळी मनायी जा री है। रूप चौदस रे चालता महिलावां मांय खासो उच्छाव देख्यो जा रह्यो है। इण दिन साज-श्रृंगार करणो शुभ मान्यो जावे है। मिन्दरां मांय सुवारे सूं ही भक्त ठाकुर जी रा दर्शन करबा ने पूग रह्या है। जन आस्था रा प्रतीक जैसलमेर रा रामेदवरा रा बाबा रामेदव मिन्दर मांय फूलां री सजावट करी गई। बाड़मेर ज़िला मांय भी दिवाळी रे चालता लोगां मांय उच्छाव निज़र आ रह्यो है। पाली मांय भी दिवाळी रे मौके बाजारां मांय खरीदारां री खासी भीड़ है। शहर मांय इण मौके खास सजावट करी गयी है। प्राचीन ब्रम्हपुरी रा महालक्ष्मी मिन्दर मांय काल खास पूजन कर्यो जावेला, इण बाबत् मिन्दर ने सोहवणा फूलां सूं सजायो जा रह्यो है। भरतपुर मायं त्यौहारां रे चालता आ दिनां वोकल फोर लोकल थीम माथे गाय रा गोबर सूं बण्या उत्पादां री खरीद खातर लोगां मांय खासो रूझान निज़र आ रह्यो। इण सामाग्री री दूजां प्रदेशां मांय भी मांग है। वठिने, भारत-पाकिस्तान अंतराष्ट्रीय सीमा माथे बी.एस.एफ. जवान सीमा चौकियां माथे दीयां अर मोमबत्तियाँ जळा र मिठाई बाँटी अर देशवासियां ने दीपावळी री शुभकामनाएँ दी। दीपोत्सव पर्व रे चालता प्रदेश भर मांय सुरक्षा रा पुख्ता बन्दोबस्त कर्या गया है। वठिने यातायात री भी खास व्यवस्था करी गई है। देशी-विदेशी सैळाणी भी दीपोत्सव रो आनंद लेबा खातर प्रदेशभर री पर्यटन री ठौड़ां पूग रह्या है। रेलवे दीवाळी, छठ पूजा अर दूजां त्यौहारां रे चालता यात्रियां खातर गाड़िया रो खास इन्तजाम कर्यो है। न्यारा यात्री भार ने देखता थकां 49 जोडी स्पेशल ट्रेनां चलायी जा रही है। वठिने 60 नियमित ट्रेनां मांय 174 न्यारा डिब्बां जोड़्या गया है।
उत्तर-पश्चिम रेलवे रा मुख्य जनसंपर्क अधिकारी शशिकिरण रे मुजब यात्रियां री बढ़ती संख्यां ने देखता थकां खास स्टेशनां माथे केई भांत री खास व्यवस्था करी गयी है। स्टेशनां माथे बत्ता लोग भेळा नी व्हे इण बाबत् फ्लेटफोर्म टिकट ने प्रतिबंधित कर्यो गयो है। राज्यपाल हरिभाऊ बागडे़ प्रदेशवासियां ने दिवाळी री शुभकामनावां दीनी। वणा आप रा शुभकामनावां संदेश मांय कह्या के यो पर्व अंधकार माथे प्रकाश री जीत रो प्रतीक है। दीपक री उजास मांय ही जीवन रो उच्छाव समायो है। वणा कामना करी के रोशनी रो यो तिवांर सगळा रा जीवन मांय खुशियां ले र आवे। वठिने मुख्यमंत्री भजन लाल शर्मा प्रदेशवासियां ने दिवाळी री शुभकामनावां देता थकां प्रदेश वासियां सूं स्वदेशी उत्पाद ने काम मांय लेबा अर पर्यावरण ने ध्यान मांय राख र प्रदूषण मुक्त दिवाळी मनावा री अरज करी।