देश गुरूवार ने राष्ट्रपिता महात्मा गांधी अर पैली रा प्रधानमंत्री लाल बहादुर शास्त्री री जयंती माथे वांने सिरधा रे साथ याद करे। नुवी दिल्ली मांय राजघाट माथे बापू री समाधि माथे सर्व धर्म प्रार्थना सभा रो आयोजन करीज्यो। राष्ट्रपति द्रौपदी मुर्मू, उपराष्ट्रपति सी.पी. राधाकृष्णन, प्रधानमंत्री नरेन्द्र मोदी अर लोकसभा अध्यक्ष ओम बिरला सवांरा महात्मा गांधी री समाधि माथे पुष्प् अर्पण कर्या। वठे ई संसद रा केन्द्रीय कक्ष मांय प्रधानमंत्री श्री मोदी अर लोकसभा अध्यक्ष श्री बिरला महात्मा गांधी अर पैली रा प्रधानमंत्री लाल बहादुर शास्त्री रा चित्रां माथे फूल अर्पण कर्या। ई मौके केन्द्रीय मंत्री किरेन रिजिजू अर पीयूष गोयल समेत केई मानेता लोग मौजूद रिया। ध्यानजोग है के गांधी जयंती रे मौके गुरूवार ने अंतर्राष्ट्रीय अहिंसा दिवस ई मनायो जावे। प्रदेश मांय राज्यपाल हरिभाऊ बागडे अर मुख्यमंत्री भजनलाल शर्मा राष्ट्रपिता महात्मा गांधी अर पैली रा प्रधानमंत्री लाल बहादुर शास्त्री री जयंती माथे वांने नमन कर्यो। मुख्यमंत्री सचिवालय पूग र गांधी जी री मूरत माथे पुष्प अर्पण कर्या अर सर्व धर्म प्रार्थना सभा मांय हिस्सो लियो। ई मौके उपमुख्यमंत्री डॉ. प्रेमचन्द बैरवा ई मौजूद रिया। न्यारा-न्यारा जिलां मांय ई महात्मा गांधी अर पैली प्रधानमंत्री लाल बहादुर शास्त्री ने श्रद्धाजंलि अर्पण करीजी। सिरोही मांय सर्वधर्म प्रार्थना सभा अर श्रद्धाजंलि कार्यक्रम व्हीया। हनुमानगढ रा कलेक्ट्रेट परिसर मांय गांधी पार्क मांय लोगां गांधी जी री मूरत माथे पुष्प अर्पण कर्या।
