देशभर रा 244 वर्गीकृत नागरिक सुरक्षा ज़िला मांय बुधवार ने गांवां रा लेवल तांई मॉक ड्रिल करी जावेला। पहलगाम आतंकी हमला पाछे देश री हिफ़ाज़ती व्यवस्था मजबूत बणावण सारू गृह मंत्रालय मोटा पैमाना माथे नागरिक सुरक्षा मॉकड्रिल करण रो फैसलो कीनो है। आ ड्रिल देशभर मांय एके सागे करी जावेला जिण रो मकसद किण ई संभावित आतंकी हमला रा हालात रो सामो करण सारू जनता ने तैयार करणो है। केन्द्रीय गृह सचिव गोविन्द मोहन इण री तैयारियां रो जायज़ो लेवण सारू राज्यां अर केन्द्र रा राज वाळा प्रदेशां रा मुख्य सचिवां सागे वीडियो कॉन्फ्रेन्स रे जरिये मीटिंग कीनी। मीटिंग मांय नागरिक सुरक्षा महानिदेशक, एनडीआरएफ रा महानिदेशक अर दूजा आला अहलकार शामिल व्ह्या। प्रदेश मांय ई राजधानी जयपुर समेत 28 शहरां मांय आ ड्रिल करी जावेला। ईं सारू सायरन लगायी ज्या है। मुख्य सचिव सुधांश पंत आला अहलकारां सागे मीटिंग कर र तैयारियां रो जायज़ो लीनो। म्हाणा चित्तौड़गढ़ खबरनवीस बतायो के मॉकड्रिल रा तहत सिटी कंट्रोल रूम ऊं हूटर बजायो जावेला अर बिजली बंद राख्यी जावेला।