दुनिया भर मांय नुवो साल 2026 धूमधाम रे साथे मनायो जावे। राष्ट्रपति द्रौपदी मुर्मु, उपराष्ट्रपति सी पी राधाकृष्णन, प्रधानमंत्री नरेन्द्र मोदी अर लोकसभा अध्यक्ष ओम बिरला ई मौके लोगां ने शुभकामनावां दी है। राष्ट्रपति आप रा संदेश मांय कह्यो कि नुवो साल, नुवी ऊर्जा अर सकारात्मक बदलाव रो प्रतीक है। उपराष्ट्रपति सोशल मीडिया पोस्ट मांय आस जतायी के ओ साल सगळा सारू शांति, स्वास्थ्य, सुख अर समृद्धि ले र आवेला। प्रधानमंत्री आशा जताई के नुवो साल सगळा सारू चौखो स्वास्थ्य अर और समृद्धि लावेला। लोकसभा अध्यक्ष ओम बिरला सोशल मीडिया माथे वीडियो संदेश साझा करता लोगां ऊँ कह्यो है के सगळा आप रा जीवन मांय सकारात्मक बदलाव लावे, तरक्की करे अर देश रा विकास मांय सक्रिय योगदान देवे। राज्यपाल हरिभाऊ बागडे आप रा शुभकामना संदेश मांय प्रदेशवासियां ऊँ नुवा साल मांय हर पल दिन कुछ नुवो करता देश अर समाज सारू आप रो ठावो देवण री अरज करी है। वठे ई मुख्यमंत्री भजन लाल शर्मा पूंछरी का लौठा रा श्रीनाथजी मन्दिर मांय पूजा-अर्चना कर प्रदेशवासियां री खुशहाली री कामना करी। विधानसभा अध्यक्ष वासुदेव देवनानी ई प्रदेश रा लोगां ने नुवा साल री शुभकामनावां दी है। ई बीचे प्रदेश मांय नुवां साल माथे मिन्दरां मांय भीड़ री। जयपुर रा मोती डूंगरी गणेश मन्दिर, गोविन्द देव जी मन्दिर समेत न्यारा-न्यारा मिन्दरां मांय श्रिद्धालु पूजा-अर्चना करी। धौलपुर, अलवर, सवाईमाधोपुर, कोटा, झुन्झुनू अर दूजा ठौड़ां ई मिन्दरां मांय श्रिद्धालुआं री कतार लागी री। रामदेवरा मांय नुवा साल रे मौके बाबा रामदेव रा दरबार मांय फूलां ऊँ खास सजावट करी ज्यी। दूजी कानी प्रदेश री नामी दर्शण ज़ोग ठौड़ां माथे नुवा साल रे पैले दिन सैलाणियां रो जमावड़ो रियो। होटलां अर रेस्टोरेन्ट मांय ई लोगां री भीड री।