दीतवार ने 19 वों सांख्यिकी दिवस मनायी ज्यो। सांख्यिकी अर आर्थिक आयोजना री नामी हस्ती प्रोफेसर पी.सी. महलानोबिस री याद मांय ओ दिन मनायो जावे है। इंर् साल रा सांख्यिकी दिवस रो मुद्दो है- राष्ट्रीय प्रतिदर्श सर्वेक्षण के 75 वर्ष। ईं मौके दिल्ली मांय राख्यी ज्या कार्यक्रम मांय सांख्यिकी अर कार्यक्रम क्रियान्वयन मंत्री राव इन्द्रजीत सिंह कह्यो के आज रा डेटा-आधारित जमाना मांय सांख्यिकी शासन री बुनियाद है। प्रदेश मांय ई सांख्यिकी दिवस रे मौके न्यारा-न्यारा कार्यक्रम राख्यी ज्या। जयपुर मांय राख्यी ज्या राज्य स्तर रा कार्यक्रम मांय राज्यपाल हरिभाऊ बागडे़ कह्यो के सूचना अर संचार प्रौद्योगिकी रा मौजूदा दौर मांय सांख्यिकी रो महत्त्व तेज़ी ऊं बध रह्यो है। वे कह्यो के साल 2047 तांई भारत ने विकसित देष बणावण रो लक्ष्य भरोसेमंद, समावेशी अर रियल टाइम आँकड़ा व्हेवण रे पाण ई साकार व्हे सकेला। कार्यक्रम मांय मौजूद मुख्यमंत्री भजन लाल शर्मा कह्यो के राज्य सरकार आंकड़ां रा आधार ऊं नीतिगत फैसला ले र सुशासन री मज़बूत बुनियाद रखी है। वे कह्यो के सरकार प्रदेश मांय सांख्यिकी तंत्र ने मज़बूत बणावण री दिशा मांय खास फैसला ले रही है। कार्यक्रम रे दौरान सांख्यिकी हलका मांय बेहतरीन काम करण वाळा जयपुर रा ज़िला कलेक्टर समेत 16 अहलकारां अर कर्मचारियां रो मान करी ज्यो। झुन्झुनू ज़िलो लगातार विकास रा लक्ष्य 2024 रा सगळा 17 बिन्दुआं माथे बेहतर काम करता थकां प्रदेष मांय अव्व्ल रह्यो। 19 वां सांख्यिकी दिवस रे मौके जारी आंकड़ां मांय ईं उपलब्धि री जाणकारी मिली। सांख्यिकी दिवस रे मौके झुन्झुनू ज़िला मुख्यालय माथे राष्ट्रीय प्रतिदर्श सर्वेक्षण के 75 वर्ष मुद्दा माथे संगोष्ठी राख्यी ज्यी। ईं पाछे विधायक राजेन्द्र भाम्बू कह्यो के सतत विकास लक्ष्य मांय झुन्झुनू ज़िलो अव्वल रहवणो प्रशासन रे मुस्तैदी ऊं काम करण ने साबित करे है।
000