दीतवार ने राष्ट्रीय प्रेस दिवस मनायो। ओ दिन प्रेस री स्वतंत्रता अर जिम्मेदारियां री कानी ध्यान देबा खातर मनायो जावे है। राष्ट्रीय प्रेस दिवस देश रा लोकतंत्र ने मज़बूत बणाबा मांय प्रेस री महता भूमिका ने याद दिलावे है। इणी दिन भारतीय प्रेस परिषद री थापना भी करी गई ही। ओ परिषद एक स्वतंत्र नैतिक प्रहरी रा रूप मांय पत्रकारिता रा मानकां ने बणाया राखबा रो काम करे है। इण मौके राष्ट्रीय प्रेस दिवस जळसो नुवी दिल्ली मांय राख्यो गयो। इण मांय केंद्रीय सूचना अर प्रसारण मंत्री अश्विनी वैष्णव अर सूचना अर प्रसारण राज्य मंत्री डॉ. एल. मुरुगन मांय शामिल व्ह्या। इण कार्यक्रम मांय भारतीय प्रेस परिषद री अध्यक्ष सुप्रीम कोर्ट री पैली री न्यायधीश न्यायमूर्ति रंजना प्रकाश देसाई भी मौजूद ही। श्री वैष्णव मीडिया सूं बातचीत मांय कया के म्हाका लोकतंत्र मांय प्रेस रे घणी महताऊ भूमिका है। प्रदेश मांय भी न्यारी-न्यारी ठोडां माथे राष्ट्रीय प्रेस दिवस रे मौके न्यारा-न्यारा कार्यक्रम राख्या गया। चूरू मांय एक निजी संस्था री कानी ऊं मीडियाकर्मियां रो सम्मान कर्यो गयो। इण मौके जिला कलेक्टर अभिषेक सुराणा कया के लोकतंत्र मांय मीडिया री अहम भूमिका है। भरतपुर मांय लोहागढ प्रेस क्लब री कानी ऊं एक संगोष्ठी राख्यी गई। इण मांय पत्रकारिता री भूमिका अर चुनौतियां माथे चर्चा करी गई। वठी ने पाली मांय आज ऊं कलक्ट्रेट परिसर मांय नुवा मीडिया कार्यालय री सजावट रो काम सरू व्ह्यो।