दिव्या देशमुख फिडे महिला शतरंज होड़ जीतण वाळी भारत री पहली महिला बण ग्यी है। दिव्या होड़ रा फाइनल मुकाबला मांय भारत री ई ग्रेण्ड मास्टर कोनेरू हम्पी ने हरा र खिताब जीत्यो। दिव्या महज़ 19 साल री उम्र मांय आ उपलब्धि हासिल कर र इतिहास रच दीनो। प्रधानमंत्री नरेन्द्र मोदी दिव्या ने आ होड़ जीतण सारू बधाई दीनी है। वे कह्यो के भारत री दो बेहतरीन खिलाड़ियां बीचे व्ह्यो ओ मुकाबलो नौजवान खिलाड़ियां ने प्रेरणा देवेला। जार्जिया मांय खेल्यी ज्या ईं मुकाबला मांय दिव्या हम्पी ने टाईब्रेकर मांय हरा र जीत हासिल कीनी। इण ऊं पैली दोन्यू बीचे क्लासिकल मुकाबला बराबरी माथे छूट्या। दूजी कानी मकाओ मांय खेली ज्यी जूनियर एशिया जूडो चैंपियनशिप रा 90 किलोग्राम भार वर्ग मांय भारत रा आराध्य चौपड़ा कांसा रो तमगो जीत्यो। जर्मनी मांय व्ह्या वर्ल्ड युनिवर्सिटी गेम्स मांय ई भारत सोना रा दो अर चांदी अर कांसा रा पांच-पांच तमगां समेत 12 तमगा जीत्या है। आं खेलां मांय भारत रो दल पदक तालिका मांय 20 वीं ठौड़ माथे रह्यो। जापान सोना रा 34 तमगा जीत र अव्वल रह्यो।