थावर ने धनतेरस सागे दीवाळी रो त्यौहार सरू व्ह्यो। ईं मौके सोना-चांदी रा सिक्का, जेवर, बर्तन, इलेक्ट्रॉनिक सामान, सजावटी चीजां अर वाहनां री खरीदी सारु मांटी तादाद मांय ग्राहक बाज़ारां मांय पूग रह्या है। जयपुर रा बाज़ारां मांय खरीददारां री मोटी तादाद ने ध्यान राखता थकां बाजारां अर परकोटा हलका मांय आवण-जावण री खास व्यवस्था करी ज्यी है। सवाईमाधोपुर मांय ई थावर नेधन तेरस रे मौके बाज़ारां मांय मोटी तादाद मांय खरीददार पूग रह्या है। लोग मिन्दरां मांय दीया जोबा सारु पूग रह्या है। सरहदी ज़िला जैसलमेर रा लक्ष्मीनाथ मिन्दर अर सोनार किला माथे रा मिन्दर मांय ई मोटी तादाद मांय जातरू पूग रह्या है। उदयपुर मांय जगदीश मन्दिर समेत न्यारा-न्यारा मिन्दरां मांय सोहवणी सजावट करी ज्यी है। दीवाळी रे मौके पूरा राज्य मांय मिन्दरां, बाज़ारां, चौराहां, खास इमारतां अर स्मारकां ने रंग-बिरंगी रोशनी ऊँ सजायी ज्या है। खास बाज़ारां मांय भारी यातायात माथे रोक लगायी ज्यी है। थावर ने धनवन्तरी जयंती ई मनायी जा रही है। ईं मौके आयुर्वेद औषधालयां मांय भगवान धनवन्तरी री पूजा-अर्चना करी ज्यी। पाली रा बांगड़ अस्पताल परिसर मांय धनवन्तरी पूजन सागे संगोष्ठी राख्यी ज्यी। दीवाळी रा पांच दिन रा त्यौहार, ज्यो ईं साल ई 6 दिन तांई मनायो जावेला, रा दूजा दिन काल रूप चौदस मनाई जावेला।