जैसलमेर मांय 14 अक्टूबर ने एक गैर-सरकारी बस मांय लाय लाग जावण रे कारण व्ह्या हादसा ऊं मरण वाळां री तादाद 21 व्हे ग्यी है। हादसा रे कारण झुलस्यो 10 साल रो एक टाबर ईलाज रे दौरान बुधवार ने संवारे दम तोड़ दीनो। जोधपुर रा महात्मा गांधी अस्पताल मांय भर्ती झुलस्योड़ा पांच जणा री हालत नाज़ुक बण्योड़ी है। ईं बीचे बळ्योड़ी लाशां री ओळखाण सारू जोधपुर अर जैसलमेर रा अस्पताल मांय डीएनए रा नमूना लिया जा रह्या है। अहलकारां रे मुजब मरण वाळा घणखर लोग जैसलमेर, जोधपुर अर आरे-सारे रा हा। जोधपुर रा महात्मा गांधी अस्पताल रा अधीक्षक डॉ. फतेह सिंह भाटी बतायो के लाशां री पिछाण मांय 24 घंटा तांई रो बगत लाग सके है। शिक्षा मंत्री मदन दिलावर बुधवार ने जोधपुर मांय महात्मा गांधी अस्पताल जा र वठे भर्ती ज़ख्मी लोगां रा ईलाज री जाणकारी लीनी। ईं पाछे खबरनवीसां सागे बातचीत करता थकां वे कह्यो के हादसा रा कारणां री जांच करी जा रही है अर जांच पाछे ऐड़ा हादसा रोकण सारू ज़रूरी सगळा जतन कर्या जावेला। ईं बीचे हादसा रे कारण मर्या एक जणा रा पिरवार वाळा बस रा मालिक अर बस चलावण वाळा रे खिलाफ जैसलमेर रा सदर थाणा मांय एफआईआर दर्ज कराई है। ध्यान जोग है के काल दोपहरां री बगत जैसलमेर ऊं जोधपुर ओड़ी जा रही एक गैर-सरकारी बस मांय लाय लाग जावण ऊं 19 जणां री मौके ई बळ जावण रे कारण मौत व्हे ग्यी ही।