जैसलमेर बस हादसा पाछे परिवहन विभाग जोधपुर मांय बणायी ज्यी बसां री जांच चाल रही है। हाल तांई 66 बसां ज़ब्त करी जा चुकी है। मामला री जांच सारू अपर परिवहन आयुक्त री सदारत मांय पाँच सदस्यां री जाँच समिति बणायी ज्यी है। ईं सागे ई पुणे रा केन्द्रीय सड़क परिवहन संस्थान-सी.आई.आर.टी. ऊँ ई तकनीकी जाँच करायी जावेला। जोधपुर रा ज़िला परिवहन अधिकारी बतायो के प्रदेश ज़िला मांय बसां री जांच रो खास अभियान चलायो जा रह्यो है। जैसलमेर मांय लारला दिनां व्ह्या बस हादसा पाछे परिवहन विभाग रा चित्तौड़गढ़ दफ़्तर रा कार्यवाहक आरटीओ अर एक सहायक प्रशासनिक अहलकार ने मुअत्तल कर दिया ज्या है। चित्तौड़गढ़ पुलिस परिवहन विभाग रा दफ्तर ऊं हादसा री शिकार बस रा रजिस्ट्रेशन ऊं जुड़्या कागज़ात अर सीसीटीवी फुटेज री डिज़िटल वीडियो रिकॉर्डिंग-डीवीआर ज़ब्त कर लीना है। ईं बीचे जैसलमेर बस हादसा मांय मरण वाळां री तादाद बध र 22 व्हे ग्यी है।