जैसलमेर जिला रा रामदेवरा मांय चाल रह्या बाबा रामदेव रा भादवा मेळा मांय मोटी तादाद मांय जातरू पूग रह्या है। 14 सितम्बर तांई चालण वाळा ईं मेळा मांय आवण वाळा जातरूआं रा सुबीता सारू चिकित्सा विभाग 10 स्वास्थ्य चौकियां बणायी है। सूचना अर प्रसारण मंत्रालय रा केंद्रीय संचार ब्यूरो रा जोधपुर क्षेत्रीय कार्यालय री ओर ऊं ई न्यारा-न्यारा कार्यक्रमां रे जरिये केंद्र सरकार री योजनावां रो प्रचार-प्रसार कर्यो जा रह्यो है। नीमकाथाना मांय तेजा दशमी रे मौके शुक्रवार ने शोभायात्रा निकाळी जावेला। नागौर ज़िला रा खरनाल मांय ई गुरूवार ने तेजाजी रो मेळो सरु व्ह्यो। दो दिन रा ईं मेळा मांय शुक्रवार ने उपराष्ट्रपति जगदीप धनखड़ रो ई सिरकत करण रो कार्यक्रम है। राज्यपाल हरिभाऊ बागडे़ रामदेव जयन्ती अर तेजा दशमी रे मौके बधाई अर शुभकामनावां दीनी है। वे रामदेव जी अर तेजाजी कानी ऊं बतायी ज्या गेला ने अपना र दीन-दुखियां री सेवा अर प्राणी मात्र रा प्रति दया भाव ऊं काम करण बाबत् कह्यो। मुख्यमंत्री भजनलाल शर्मा ई रामदेव जयन्ती अर तेजा दशमी रे मौके जनता ने शुभकामनावां दीनी है। वे जनता ऊं बाबा रामदेव अर वीर तेजाजी रा आदर्श अपनावण री अपील कीनी। ईं बीचे चूरू जिला रा झारिया मांय भादवी नवमी रे मौके लागण वाळो गोगा पीर रो मेळो भर रह्यो है। मेळा मांय 40 ऊं बत्ता गांवां ऊं जातरू पूग्या।