जैसलमेर अर गुजरात ऊं लागती भारत-पाक अंतर्राष्ट्रीय सीमा रा हलका मांय देश री सेना रा तीन ई अंगां रो भेळो महा अभ्यास त्रिशूल चाल रह्यो है। नौसेना परिचालन महानिदेशक वाइस एडमिरल ए.एन. प्रमोद नई दिल्ली मांय खबरनवीसां ने आ जाणकारी दीनी। वे बतायो के 13 नवम्बर तांई चालण वाळा ईं युद्ध अभ्यास मांय फौज री दक्षिणी कमान, नौसेना री पश्चिमी कमान, वायु सेना री दक्षिण-पश्चिम कमान अर तट रक्षक बल, सीमा सुरक्षा बल अर दूजी केन्द्रीय एजेंसियां शामिल व्हे रही है। अभ्यास मांय नौसेना रा 20-25 युद्ध पोत अर वायु सेना रा 40 लड़ाकू जहाज़ ई शामिल है। वाइस एडमिरल प्रमोद कह्यो के ईं अभ्यास रो मकसद समुद्री अर दूजा रक्षा बलां बीचे तालमेल बधावणो है। ईं मौके नौसेना उपप्रमुख वाइस एडमिरल संजय वात्स्यायन कह्यो के ऑपरेशन सिंदूर बंद नी व्ह्यो है। वे कह्यो के भारतीय नौसेना हिन्द महासागर हलका मांय दाखिल व्हेवण वाळा चीन रा हर पोत माथे नजर बणायोड़ी है। वाइस एडमिरल वात्सायन बतायो के अमरीका अर रूस विशाखापत्तनम मांय आवता साल फरवरी महीना मांय व्हेवण वाळा अन्तर्राष्ट्रीय बेडा निरीक्षण अर नौसेना अभ्यास मिलन मांय शामिल व्हेवण री हामी भर दीनी है।