जयपुर मांय हरमाड़ा हलका रा लोहा मंडी मांय सोमवार ने दोपहरां पाछे तेजी़ ऊँ जा रह्या डंपर रा ब्रेक फेल व्हे जावण रे कारण डंपर केई गाड़ियां ने टक्कर मार दीनी। ईं हादसा रे कारण चौदह जणा री मौत व्हे ग्यी अर केई लोग ज़ख्मी व्हे ग्या। जयपुर पश्चिम रा पुलिस उपायुक्त हनुमान प्रसाद मीणा बतायो के पुलिस डंपर रा ड्राइवर ने हिरासत मांय ले र वां री स्वास्थ्य जांच करायी है। चिकित्सा मंत्री गजेंद्र सिंह खींवसर बतायो के ज़ख्मी लोगां ने तुरत पास रा कांवटिया अस्पताल पूगायी ज्या, जद के घणा ज़ख्मी पांच जणां ने सवाईमानसिंह अस्पताल मांय भेजी ज्या। मौके मौजूद एक जणो बतायो के डंपर सब ऊँ पैली एक कार ने टक्कर मारी, ज्यीं पाछे आगे दूजी गाड़ियां अर मिनखां ने रौंदतो थको निकळ ग्यो। प्रधानमंत्री नरेन्द्र मोदी ईं हादसा माथे दुख जतायो है। वे हादसा रे कारण मरण वाळां रा पिरवार वाळां ने प्रधानमंत्री राहत कोष ऊं 2-2 लाख रुप्या अर जख्मी व्ह्या लोगां ने 50-50 हजार रूप्या री मदद देवण रो ऐलाण कीनो। मुख्यमंत्री भजनलाल शर्मा ईं हादसा माथे गहरा शोक जतायो अर अहलकारां ने ज़ख्मी लोगां रा बेहतर ईलाज रा हुकम दीना। उपमुख्यमंत्री दिया कुमारी अर चिकित्सा मंत्री गजेंद्र सिंह खींवसर ईं हालात माथे निजर राख रह्या है। ईं बीचे, प्रदेश मांय सड़क हादसां री बधती तादाद ने ध्यान राखता थकां मुख्यमंत्री भजन लाल शर्मा रो सोमवार ऊँ आला अहलकारां सागे मीटिंग करण रो कार्यक्रम है।