जयपुर मांय सोमवार ने व्ह्या ज़ोरदार सड़क हादसा पाछे मंगलवार ने आखा राज्य मांय सड़क सुरक्षा अभियान चलायी ज्यो। 18 नवम्बर तांई चालण वाळा ईं अभियान रा तैत परिवहन अर पुलिस विभाग गैर कानूनी तरीका ऊँ चाल रही गाड़ियां रे खिलाफ़ कार्यवाही कीनी। परिवहन विभाग रा अतिरिक्त आयुक्त ओ.पी. बुनकर बतायो के यातायात नियमां री अवहेलना करण वाळां रे खिलाफ़ नियम रे मुजब कार्यवाही करी जा रही है। ईं बीचे पुलिस न्यारा-न्यारा शहरां मांय अर नेशनल हाईवे माथे तेज़ गति ऊँ अर शराब पी र गाड़ियां चलावण वाळां रे खिलाफ़ कार्यवाही कर रही है। ध्यानजोग है के मुख्यमंत्री भजनलाल शर्मा राज्य मांय लारला कुछ दिनां ऊँ व्हे रह्या सड़क हादसां ने ध्यान राखता थकां न्यारा-न्यारा महकमां रा अहलकारां रे सागे काल रात मीटिंग कीनी ही, जिण मांय सड़क हादसां री रोकथाम सारू जरूरी जतन करण रा हुकम दिया ज्या। ईं बीचे काल जयपुर मांय व्ह्या सड़क हादसा रे कारण जख़्मी व्ह्या 14 जणा रो जयपुर रा सवाईमानसिंह अस्पताल मांय ईलाज चाल रह्यो है ज्यां मांय ऊँ दो जणा री हालत चिंता जोगी है।