जयपुर मांय बुधवार ने प्रवासी राजस्थानी दिवस कार्यक्रम राख्यो जा रह्यो है, जिण मांय देश-परदेश ऊँ आया प्रवासी राजस्थानी भाग ले रह्या है। कार्यक्रम मांय राज्यपाल हरिभाऊ बागड़े, पंजाब रा राज्यपाल गुलाब चंद कटारिया अर मुख्यमंत्री भजनलाल शर्मा समेत केई केंद्रीय मंत्री, राज्य मंत्रिपरिषद् रा सदस्य, केई नामी उद्योगपति, देश-परदेश ऊँ आया प्रवासी राजस्थानी अर मान्योड़ा लोग मौजूद रह्या। ईं मौके राज्यपाल हरिभाऊ बागडे़ प्रवासी राजस्थानियां ऊँ मायड़ ज़मीं रो कर्ज चुकाता थकां प्रदेश मांय बत्तो ऊँ बत्तो निवेश करण री अपीली कीनी। कार्यक्रम मांय मुख्यमंत्री भजन लाल शर्मा कह्यो के राजस्थान संभावनावां रो प्रदेश है जठे करोबार री मोकळी संभावनावां है। श्री शर्मा कह्यो के देश अर दुनिया मांय नाम कमावण वाळा प्रवासी राजस्थानी हमेशा जड़ां ऊँ जुड़्या रह्या है। वे प्रवासी राजस्थानियां ऊँ राज्य मांय निवेश करण सारू सरकार री ओर ऊँ हर संभव मदद रो भरोसो दिरायो। कार्यक्रम मांय केंद्रीय उद्योग अर वाणिज्य मंत्री पीयूष गोयल राजस्थान ने रीति-रिवाज़, आधुनिकता, विकास अर विरासत रा संतुलन वाळो राज्य बतायो। वे कह्यो के राजस्थान री सब ऊँ मोटी ताकत नौजवानां री बड़ी तादाद है, ज्यीं रे पाण राज्य तेज़ी ऊँ आगे बढ़ रह्यो है। ईं मौके पंजाब रा राज्यपाल गुलाब चंद कटारिया कह्यो के राजस्थान रा विकास मांय प्रवासी राजस्थानियां रो योगदान ऐतिहासिक और अनुकरणीय रहा है। कार्यक्रम मांय वेदांता ग्रुप रा चेयरमैन अनिल अग्रवाल कह्यो के राजस्थान री धरती हेटे लुक्योड़ो खनिज भंडार आखा देश ने ऊर्जा, धातु अर कुदरती साधनां रा हलका मांय खुद रे पाण ऊबो करण रो बूतो राखे है। टाटा पावर रा सीईओ अर एमडी प्रवीर सिन्हा कह्यो के राज्य मांय सूरज री रोशनी ऊँ 800 गीगावाट अर हवा रा वेग ऊँ 200 गीगावाट बिजली बणावण रो बूतो है। कार्यक्रम रे दौरान 1 लाख करोड़ रुप्या रा निवेश प्रस्तावां ने लागू करी ज्या, जिण ऊँ राइजिंग राजस्थान समिट पाछे काम सरू व्हेवण वाळी परियोजनावां ऊँ जुड़्या खर्चा री रकम बध र 8 लाख करोड़ रुप्या तांई पूग ग्यी है। कार्यक्रम मांय देश-विदेश मांय खास उपलब्धियां हासिल करण परां अनिल अग्रवाल, कुमार मंगलम बिड़ला, विनीत मित्तल, अजय पीरामल, माधव सिंघानिया, पूनमचंद राठी, नरसी कुलरिया, सी.एम. मूंदड़ा अर प्रदीप राठौड़ ने ‘प्रवासी राजस्थानी मान’ दे र नवाज़ा। कार्यक्रम रे दौरान न्यारा-न्यारा हलकां ऊँ जुड़्या सत्र ई राख्यी ज्या। सिंज्यां री पोर सांस्कृतिक संध्या राख्यी जा रही है।