जयपुर मांय पुलिस रा हैड कांस्टेबल बाबूलाल बैरवा कानी ऊं आप-हित्या करण रा मामला री तुरत जांच सारु अतिरिक्त पुलिस महानिदेशक दिनेश एम.एन. री अगुवाई मांय खास जांच टीम- एस.आई.टी. बणावण रो फैसलो करी ज्यो है। उप मुख्यमंत्री प्रेम चंद बैरवा वां रा रेहवास माथे आ जाणकारी दीनी। वे बतायो के मर्या हैड कांस्टेबल बैरवा रा बेटा ने बेगी ई सरकारी नौकरी अर वां री बेटी ने जयपुर मांय संविदा रा आधार ऊं नौकरी दी जावेला। ईं रे अलावा मर्या हैड कांस्टेबल री बेटी ने पुलिस परिवार गोद ले र वां री भणाई-लिखाई अर ब्याह री ज़िम्मेदारी पुलिस महकमा रा अहलकार अर कर्मचारी उठावेला। पुलिस महकमा री ओर ऊं स्वैच्छिक आर्थिक सहयोग री प्रक्रिया ई बेगी ई पूरी कर ली जावेला। उप मुख्यमंत्री बतायो के मरण वाळा हैड कांस्टेबल रा सेवा परिलाभ री रकम अर पेंशन री प्रक्रिया ई बेगी ई सरू कर दी जावेला। ईं मामला मांय हाल तांई आर.पी.एस. अहलकार अनिल शर्मा अर जगदीश व्यास ने ए.पी.ओ. अर एस.आई. आशुतोष सिंह ने मुअत्तल करी ज्या है। ईं बीचे आज सरकार सागे बातचीत पाछे मर्या हैड कांस्टेबल रा पिरवार वाळा वां रो दाग करण सारु राज़ी व्हे ग्या है।