राज्य मानवाधिकार आयोग प्रदेश मांय बसां मांय लाय लागण रा वाकयां रो संज्ञान लेता थकां परिवहन विभाग ने बसां री हिफ़ाजत ऊँ जुड़्या मापदण्ड री पालना तैय करावण रा हुकम दीना है। आयोग लारला दिनां जैसलमेर मांय अर मंगलवार ने जयपुर-दिल्ली हाई-वे माथे बस मांय लाय लागण रा वाकयां ने गंभीर मान्या। आयोग मंगलवार ने मनोहरपुर कने बस मांय लाय लाग जावण रा वाकया री जयपुर रा ज़िला कलेक्टर अर परिवहन आयुक्त ऊँ रपट मांगी है। इंर् बीचे, मंगलवार ने मनोहरपुर कने बस मांय लाय लागण रे कारण घणा जख्मी व्ह्या पांच जणा रो जयपुर रा सवाईमानसिंह अस्पताल मांय ईलाज चाल रह्यो है। जयपुर रा ज़िला कलेक्टर जितेन्द्र सोनी हादसा री ठौड़ा रो दौरो कीनो। वे खबरनवीसां ने बतायो के बस मांय उत्तरप्रदेश रा पीलीभीत ऊँ मजूर जयपुर आ रह्या हा। वे बतायो के हादसा ऊँ जुड़ी जांच करी जा रही है। इंर् बीचे जैसलमेर मांय लारला दिनां बस मांय लाय लाग जावण रे कारण मरण वाळां री तादाद बध र 28 व्हे ग्यी है। ईं हादसा मांय जख्मी एक जणा री मंगलवार ने जयपुर रा सवाईमानसिंह अस्पताल मांय मौत व्हे ग्यी। दूजी कानी जोधपुर रा महात्मा गांधी अस्पताल मांय भर्ती दो ज़ख्मी लोगां री हालत जस की तस बण्योड़ी है।