जम्मू-कश्मीर रा पहलगाम मांय मंगलवार ने व्ह्या आतंकी हमला ऊं उपज्या हालात रो जायजो लेवण सारू प्रधानमंत्री नरेन्द्र मोदी री सदारत मांय आला दर्जा री मीटिंग व्हे रही है। प्रधानमंत्री रा रहवास माथे चाल रही ईं मीटिंग मांय गृहमंत्री अमित शाह, रक्षामंत्री राजनाथ सिंह अर विदेश मंत्री एस. जयशंकर ई शामिल है। मीटिंग मांय आतंकी हमला री जवाबी रणनीति रा बारा मांय चर्चा करी जा रही है। ध्यानजोग है के ईं हमला मांय 2 स्थानीय लोगां समेत 26 सैलाणियां री मौत व्हे ग्यी ही। पुलिस अर खुफिया एजेन्सियां री ओर ऊं हमलो करण रा आरोपित तीन जणां रा स्कैच जारी करी ज्या है। इंर् आतंकी हमला मांय मरण वाळा रा पिरवार वाळां ने जम्मू-कश्मीर सरकार री ओर ऊं 10-10 लाख रूप्या री मदद रो ऐलाण करी ज्यो है। रक्षामंत्री राजनाथ सिंह फौज रा तीन्यू अंगां रा आला अहलकारां सागे कश्मीर घाटी मांय हालात रो जायज़ो लीनो। वे कह्यो के वारदात रा ज़िम्मेदार हमलावरां ने नी बख्शा जावेला। रक्षा मंत्री कह्यो भारत एक मोटो देश है जिण ने किण ई कीमत परां डरायो नी जा सके है। गृहमंत्री अमित शाह इण ऊं पैली जम्मू कश्मीर मांय पहलगाम रा बेसरन हलका मांय वारदात री ठौड़ रो दौरो कीनो। श्री शाह अनन्तनाग रा अस्पताल मांय भर्ती जख्मी लोगां सागे ई मुलाकात कर र वां रो हाल-चाल पूछ्यो। राष्ट्रपति द्रौपदी मुर्मू, उपराष्ट्रपति जगदीप धनखड़ अर प्रधानमंत्री नरेंद्र मोदी समेत केई सियासी पार्टियां रा नेता ईं आतंकी हमला री करड़ी निंदा कीनी है। पूरी दुनिया अर देश मांय ईं बर्बर आतंकी कार्यवाही री करड़ी निन्दा करी जा रही है। प्रदेश मांय ई न्यारी-न्यारी ठौड़ां पहलगाम आतंकी हमला रे खिलाफ़ प्रदर्शन करी ज्या। पहलगाम आतंकी हमला रे पाछे उपजा हालात ने ध्यान राखता थकां आज श्रीनगर ऊं दिल्ली अर मुंबई सारू चार खास उड़ानां री व्यवसथा करी ज्यी है। ज़रूरत पड़्यां सैलाणियां सारू और उड़ानां तैयार राख्यी ज्यी है। नागरिक उड्डयन मंत्री राम मोहन नायडू ई सगळी हवाई कंपनियां ने भाड़ो नी बधावण रा हुकम दीना है, ताकि मौजूदा मुश्किल बगत मांय किण ई मुसाफिर माथे बोझ नी पड़े। आतंकी वारदात ने ध्यान राखता थकां उत्तर रेलवे ई वैष्णो देवी-कटरा ऊं नई दिल्ली सारू आज रात खास रेलगाड़ी चलावण रो ऐलाण कीनो है।