जन स्वास्थ्य अभियांत्रिकी मंत्री कन्हैया लाल चौधरी कह्यो है के लारला दो साल मांय 7 हज़ार 900 ऊँ बत्ता गांवां ने जल जीवन मिशन ऊँ जोड़ी ज्या। वे जल संसाधन मंत्री सुरेश रावत सागे बुधवार ने जयपुर मांय खबरनवीसां सागे बातचीत रे दौरान वां रा महकमा मांय लारला दो साल मांय करायी ज्या कामां री जाणकारी दे रह्या हा। श्री चौधरी बतायो के प्रदेश रा लारला कांग्रेस राज मांय करीब 3 हज़ार 900 करोड़ रुप्या रा खर्च ऊँ नळ रा केवल 11 लाख कनेक्शन दिया ज्या हा, जद के मौजूदा राज मांय जल जीवन मिशन ऊँ जुड़्या कामां माथे 5 हज़ार 300 करोड़ रुप्या खर्च कर्या जा चुक्या है। श्री चौधरी बतायो के ’अमृत 2’ योजना रा तैत नगर निकायां मांय तेज़ी ऊँ काम कराया जा रह्या है। जल संसाधन मंत्री सुरेश रावत बतायो के पूर्वी राजस्थान नहर परियोजना-ईआरसीपी ऊँ जुड़्या कामां सारू मध्यप्रदेश शासन अर केंद्र सरकार सागे करार करी ज्यो है अर 9 हज़ार 600 करोड़ रूप्या रा वर्कऑर्डर जारी कर दिया ज्या है। वे कह्यो के शेखावाटी तांई यमुना नदी रो पाणी पूगावण ऊँ जुड़्या कामां री डीपीआर बेगी ई तैयार करी जावेला।