जनजातीय स्वतंत्रता सेनानी, धरती आबा बिरसा मुंडा री डोढ़ सौ वीं जयंती रे मौके थावर ने वां ने सिरधाभाव सागे याद करी ज्या। राष्ट्रपति द्रौपदी मुमू, उपराष्ट्रपति सी.पी. राधाकृष्णन अर लोकसभा अध्यक्ष ओम बिरला वां ने संसद भवन मांय फूल चढ़ा र याद कीना। ईं मौके थावर ने आखा देश मांय जनजातीय गौरव दिवस मणायी ज्यो। ईं मौके प्रधानमंत्री कह्यो के देश री आज़ादी री लड़ाई मांय जनजातीय समाज रा योगदान ने हमेशा याद कर्यो जावेला। प्रधानमंत्री जनजातीय महामानव बिरसा मुंडा री जयंती रे मौके थावर ने गुजरात रा नर्मदा ज़िला रा डेडियापाड़ा मांय राख्यी ज्यी सभा ने ई सम्बोधित कीनी। वे कह्यो के जनजातीय समाज हमेशा देश रा भला सारू काम कीनो। प्रधानमंत्री कह्यो के थावर ने श्री गोविंद गुरु पीठ जनजातीय भाषा संवर्धन केंद्र ई सरू करी ज्यो है, जठे जनजातियां री बोलियां रा बारा मांय पढ़ाई-लिखाई करायी जावेला। श्री मोदी कह्यो के जनजातियां ऊं जुड़ी कहानियां अर गीतां ने ई ईं केंद्र मांय हेर र राख्या जावेला। प्रधानमंत्री कार्यक्रम मांय 9 हजार करोड़ रुप्या ऊं बत्ती रकम रा खर्च वाळी विकास री न्यारी-न्यारी योजनावां रा काम री नींव रख्यी अर पूरा व्ह्या काम जनता ने सूंप्या। भगवान बिरसा मुण्डा री जयंती आज जनजातीय गौरव दिवस रा तौर ऊं मनायी जा रही है। ईं मौके राज्य थावर ने ई न्यारा-न्यारा कार्यक्रम राख्यी ज्या। मुख्यमंत्री भजनलाल शर्मा डूंगरपुर मांय राख्यी ज्या राज्य स्तर रा जनजातीय गौरव दिवस समारोह मांय 87 करोड़ रुप्या रा खर्च वाळा विकास रा कामां री सरूआत कीनी अर पूरा व्ह्या काम जनता ने सूंप्या। ईं मौके वे किसानां रा खातां मांय खास सरकारी योजनावां रा तैत अनुदान री रकम भेजी। मुख्यमंत्री नौजवानां सारू कौशल प्रशिक्षण कार्यक्रम, 3 ज़िलां मांय आरएस-सीआइटी कोर्स अर विद्यार्थियां सारू आवासीय बैच री सरूआत ई कीनी। श्री शर्मा विद्यार्थियां सारु पोशाक अर स्टेशनरी री खरीदी बाबत् रकम ई दीनी। वे जनजाति योजना अर साहित्य ऊं जुड़ी दो पत्रिकावां रो विमोचन कीनो अर चोखा काम करण वाळा अर भणाई-लिखाई मांय अव्वल रेहवण वाळां ने जनजाति गौरव सम्मान अर जनजाति प्रतिभा सम्मान दे र नवाज़ा। मुख्यमंत्री गुजरात रा डेडियापाड़ा मांय प्रधानमंत्री नरेन्द्र मोदी री मौजूदगी मांय राख्यी ज्या जनजाति गौरव दिवस कार्यक्रम मांय वीडियो कॉन्फ्रसिंग रे मार्फत भाग लीनो। बाड़मेर मांय पशुपालन मंत्री अर ज़िला रा प्रभारी जोराराम कुमावत शोभायात्रा ने हरी झंडी बता र रवाना कीनी। राजसमंद मांयं निकाळी ज्यी शोभायात्रा मांय जनजातीय कलाकार नाच-गाण रा कार्यक्रम पेश कीना। ईं मौके राख्यी ज्या जळसा मांय आदिवासी समाज रा 50 पिरवारां ने जमीं रा पट्टा देवण री मंजूरी दीरीजी। पाली मांय जिला रा प्रभारी मंत्री झाबर सिंह खर्रा बिरसा मुंडा री तस्वीर माथे सिरधा रा फूल चढ़ाया। करौली मांय राख्यी ज्या कार्यक्रम मांय गृह राज्यमंत्री जवाहर सिंह बेढ़म ई मौजूद रह्या। अजमेर, बारां, सिरोही, बांसवाड़ा अर बालोतरा समेत न्यारी-न्यारी ठोड़ां राख्यी ज्या कार्यक्रमां मांय भगवान बिरसा मुंडा री हिम्मत, संघर्ष अर देश री आजादी अर जनजातियां रा हकां री हिफाजत सारू करी ज्या जतन ने याद करी ज्या।