चिकित्सा अर स्वास्थ्य मंत्री गजेन्द्र सिंह खींवसर कह्यो है के मुख्यमंत्री निःशुल्क दवा योजना रा तैत पूर्ति करीजी खांसी रोकण री पीवण री दवाई रा छह नमूनां री जांच रपट मांय सगळा नमूना मानक गुणवत्ता रा मिल्या है। वे आज जोधपुर मांय खबरनवीसां सागे बातचीत कर रह्या हा। मंत्री बतायो के भरतपुर अर सीकर समेत केई ठोड़ां ऊं दवाई डेक्सट्रोमेथॉर्फ़न सिरप काम लेवण ऊं उल्टी अर घबराहट व्हेवण सरीखी शिकायतां मिली ही, ज्यीं पाछे महकमो तुरत शिकायत वाळा बैच री दवाई काम लेवण माथे रोक लगा दीनी ही। मंत्री बतायो के एहतियातन ईं दवाई री पूर्ति करण वाळी कंपनी कायसन फार्मा री सगळी 19 भांत री दवाइयां काम लेवण माथे आवता हुकम तांई रोक लगा दीरीजी है। ईं बीचे, सरकार दवाइयां मांय साल्ट री मात्रा रा मानक निर्धारण माथे असर डालण रा मामला मांय औषधि नियंत्रक राजाराम शर्मा ने मुअत्तल कर दीना है। राज्य सरकार केंद्र कानी ऊं दीरीजी राय ने ध्यान राखता थकां दो साल ऊं छोटा बच्चां ने आ दवाई नी देवण सारु कह्यो है।