गृह राज्य मंत्री जवाहर सिंह बेढ़म अर कैबिनेट मंत्री किरोड़ी लाल मीणा थावर ने दौसा रो दौरो कीनो। वे एक अस्पताल रा उद्घाटन जळसा मांय सिरकत कीनी। ईं पाछे खबरनवीसां सागे बातचीत करता थकां बेढ़म कह्यो के राज्य री मौजूदा सरकार अपराधां माथे लगाम लगावण सारू लगातार काम कर रही है। वे कह््यो के प्रदेश री जेलां मांय ई सुधार कर र व्यवस्था चाक-चौबंद करण री कोशिश करी जा रही है। गृह राज्य मंत्री राज्य रा पैली वाळा मुख्यमंत्री अशोक गहलोत माथे एक सोशल मीडिया हैण्डल माथे भरमावण वाळी बेबुनियाद पोस्ट अपलोड करण रो आरोप माण्ड्यो। कैबिनेट मंत्री किरोड़ी लाल मीणा कह्यो के बत्ती बिरखा रे कारण साखां ने व्ह्या नुकसाण री भरपाई करी जावेला अर टूटी सड़कां सुधारी जावेला। मीणा कह्यो के घणी बिरखा रे कारण ढां़ढ़ा-ढ़ोरां मांय बीमारी रे कारण दौसा ज़िला रा ठीकरिया गांव मांय कुछ मवेशियां री मौत री खबर मिली है, ज्यीं पाछे पशुपालन विभाग ने पशुआं रे टीका लगावण रा हुकम दिया ज्या है।